Darllen gwefusau: 'Mae 'mywyd i lot gwell'
- Cyhoeddwyd
Ifan gyda'i gap cyntaf i dîm byddar Gymru yn 2017
Mae person byddar wedi ymddangos ar y rhaglen boblogaidd Love Island ar ITV2 am y tro cyntaf erioed gan roi sgwrs ynglŷn ag unigolion byddar ein cymdeithas o dan y chwyddwydr.
Yn dilyn hyn mae llawer o drafod wedi bod ar y rhaglen, sy'n denu 2.4 miliwn o wylwyr yn wythnosol, am "superpower" Tasha Ghouri i ddarllen gwefusau.
Bu Aled Hughes yn sgwrsio gydag Ifan Roberts sydd yn "giamstar," yng ngeiriau'r cyflwynydd, ar ddarllen gwefusau hefyd.
Daw Ifan o Gaernarfon ac mae'n gweithio fel peiriannydd i gwmni Rolls Royce ym Mryste. Fe gafodd ei eni yn fyddar ac un o ganlyniadau hynny ydi ei fod o wedi gorfod addasu i ddeall pobl drwy edrych ar symudiadau ceg.
"Dwi'n gallu darllen gwefus ac mae o yn helpu llwyth," meddai Ifan. "Dros y blynyddoedd dwi 'di dod yn dda yn gwneud o wrth glywed 'chydig bach a darllen gwefus. Dwi'n gallu rhoi'r ddau beth at ei gilydd a ma 'mywyd i lot gwell."
"Dw'i 'di dysgu sgiliau bach i wella a rŵan mae o yn berffaith. Dwi'n gallu darllen gwefus rhywun o ochr arall o'r stafell ac ochr arall o'r adeilad. Dwi'n clywed lot o gossips yn gwaith!"
Y model a dawnswraig Tasha Ghouri o'r gyfres Love Island
'Addasu'
Ni wyddai rhieni Ifan ei fod yn fyddar nes oedd yn bedair oed.
"Pan ti'n blentyn bach a ddim yn ymateb a methu siarad dwyt ti methu deud wrth rywun bo chdi methu clywed nhw," meddai.
"Y broblem ydi mewn ardaloedd mewn Caernarfon does 'na ddim lot o bobl fyddar. Does 'na ddim lot o bobl oed fi yng Ngogledd Cymru sydd yn fyddar.
"Ges i help gan y bobl iawn wedyn a wnaeth bob dim newid."
Wrth iddo fynd yn hŷn mae Ifan wedi dod i'r arfer â'r heriau cymdeithasol o fod yn fyddar ac o ganlyniad mi ddysgodd ei hun sut i ddarllen gwefusau, a hynny heb unrhyw hyfforddiant.
"Roedd o i gyd yn naturiol, nes i 'rioed gael hyfforddiant i ddarllen gwefus. Dwi ddim yn gwbod os oedd 'na help yna ond ges i ddim yr help yna.
"Dwi wedi gorfod addasu i bobl. Dwi'n byw yn Bristol ac mae acen fan'ma mor anodd i'w ddallt. Weithiau yng Nghaerdydd dwi'n ffeindio hi'n anodd dallt yr acen ond dwi 'di dod i arfer rŵan ag efo digon o hyder i ddeud wrth rywun 'ti angen slofi lawr rŵan, ti angen siarad yn fwy clir. I helpu ni'n dau i gael sgwrs gall, mae'n rhaid i chdi slofi lawr'."
"Erbyn rŵan mae pawb yn hapus i wneud o. Mae o un o hogiau gwaith o'r Alban a dwi byth yn dallt o ond rŵan 'dan ni di dod i arfer siarad yn ara' bach ac mae o'n gweithio reit dda."
'Cymuned'
Pan nad yw'n creu car Rolls Royce mae'n chwarae pêl-droed i dîm Bristol Deaf FC.
"Nes i ymuno rhyw ddwy flynedd yno ôl ac o'n i 'di symud i le o'n i ddim yn 'nabod neb, i ddinas oedd mor fawr i gymharu â Chaernarfon.
"Wnaethon nhw ddod â fi mewn i'r gymuned a 'dan ni yn chwara' timau ar draws Prydain - mae o yn brofiad anhygoel. Wnaethon ni ennill cwpan yn Peterborough yn ddiweddar ac roedd o yn briliant."
Ac nid unig wrth chwarae daw darllen gwefusau yn ddefnyddiol, ond wrth wylio hefyd…
"Dwi'n gallu dallt be mae'r chwaraewyr yn deud weithiau, mae o'n hwyl."
Ifan yng nghrys Bristol Deafs FC
'Agor y drysau'
Mae Ifan yn falch o weld fod person byddar rŵan yn llygad y cyhoedd ar blatfform mor boblogaidd â Love Island.
"Mae 'na lwyth o bobl yn gwylio. Y mwya' o bobl sy'n deall be 'dan ni'n mynd trwy a deall be di problemau ni a sut i wneud o yn haws i ni yr hawsa ydi o i bawb ar y diwedd," meddai.
"Mae'n bwysig oherwydd 'dan i'n cael y spotlight ac mae 'na fwy o bobl byddar yn meddwl, 'o dwi'n gallu gwneud be ma hi'n neud' a bydd pobl yn deall bod 'na fwy o bobl fyddar yn y byd sydd yn dalentog gan wybod dy fod yn gallu gwneud pethau fel na.
"Mae'n agor y drysau i bawb ac mae'n wych i weld be ma' hi'n gwneud a gobeithio bod pobl ifanc byddar yn meddwl, dwi'n gallu gwneud hyn."
Hefyd o ddiddordeb: