Cyhuddo dyn o lofruddiaeth yng Nghasnewydd

Swyddogion heddlu yn Heron Way ble bu farw Carl Ball ddydd Gwener 19 Awst

Mae dyn 39 oed o ardal Casnewydd wedi cael ei gyhuddo o lofruddio dyn arall yn y ddinas.

Cafodd y gwasanaethau brys eu galw i gyfeiriad yn Heron Way tua 16:40 ddydd Gwener 19 Awst wedi adroddiadau bod dyn 51 oed "yn cael argyfwng meddygol tu allan i eiddo".

Mae Heddlu Gwent wedi cadarnhau mai Carl Ball oedd y dyn a fu farw.

Cadarnhaodd y llu hefyd bod ail ddyn, 27, a oedd hefyd wedi ei arestio ar amheuaeth o lofruddiaeth, wedi ei ryddhau ar fechnïaeth amodol.

Dywed teulu Mr Ball mewn datganiad bod perthnasau a ffrindiau "mewn sioc eithriadol wedi'r hyn sydd wedi digwydd, mae'n teimlo mor afreal".

Ychwanegodd y datganiad bod Mr Ball "yn cael ei garu a'i drysori ganddom ni oll".