Rob Page: Angen perfformaid i roi 'balchder i'n cefnogwyr'

Rheolwr Cymru, Rob PageGetty Images

Mae Rob Page wedi cyfaddef ei fod wedi'i siomi gyda'r perfformiadau hyd yn hyn

Mae Rob Page wedi cyfaddef bod ei chwaraewyr wedi gwywo dan bwysau yng Nghwpan y Byd a bod yn rhaid nawr dangos asgwrn cefn yn y gêm yn erbyn Lloegr.

Mewn cynhadledd i'r wasg yn Qatar ddydd Llun, dywedodd rheolwr Cymru ei fod yn bryd i'r chwaraewr dyfu i fyny neu, yn ei eiriau ef, wisgo'u "big boy pants".

Mae Cymru ar waelod Grŵp B ar ôl gêm gyfartal yn erbyn yr Unol Daleithiau a cholli i Iran.

Mae'n rhaid i Gymru guro Lloegr ddydd Mawrth i fod ag unrhyw obaith o gyrraedd rownd nesaf y gystadleuaeth.

'Symud ymlaen'

"Rydym wedi gweithio mor galed i gyrraedd y sefyllfa yma," meddai Page.

"Fy rhwystredigaeth a fy siom i o ran y chwaraewyr yw nad ydym wedi dangos unrhyw beth tebyg i'r lefel o berfformiad wnaeth sicrhau ein bod yn cyrraedd Cwpan y Byd.

"Dyna go iawn sydd wedi fy siomi.

"Rydym wedi siarad am hyn, mae'n rhaid nawr tynnu llinell dan hynny."

Ben Davies: 'Rhaid taflu popeth at y gêm' yn erbyn Lloegr

Yn y gêm arall ddydd Mawrth bydd Iran, sydd yna ail yn y grŵp ar dri phwynt, yn wynebu'r Unol Daleithiau sydd â dau bwynt.

"Dyw hi ddim bwys am y canlyniad arall, pe bai ni yn mynd adre neu fynd ymlaen i'r rownd nesa, mae'n rhaid i ni roi perfformiad y bydd ein cefnogwyr yn falch ohono," meddai Page.

"Rydym am ymateb mewn modd positif, a byddai'n pigo tîm fydd yn mynd allan a rhoi popeth i'r achos."

Dim sicrwydd o ddechrau Bale a Ramsey

Yn y gynhadledd fe gafodd Page hefyd ei holi am Gareth Bale ac Aaron Ramsey, ac a fyddan nhw'n dechrau'r gêm ddydd Mawrth.

"Mae'n ofyn mawr i unrhyw un yn y math yma o amgylchedd i fynd eto o fewn pedwar diwrnod," meddai wrth ymateb.

"Rwy'n mynd i bigo tîm dwi'n meddwl gall fynd allan a chystadlu yn erbyn Lloegr, bod hynny gyda nhw neu hebddyn nhw. Dwi ddim am ddatgelu'r gyfrinach yna heddiw."

Getty Images

Mae Gareth Bale wedi ennill 110 o gapiau - mwy nag unrhyw chwaraewr arall yn y crys coch

Ychwanegodd: "Os nad ydynt yn dechrau, ydyn nhw'n gallu gwneud impact? Dyna wastad y dilema wrth chwarae gemau fel hyn yn syth ar ôl ei gilydd.

"Pe bai nhw'n dechrau un gêm, ydyn nhw'n gallu dechau'r nesa. Bydd y ffordd dwi'n meddwl am y broblem ddim yn wahanol i beth dwi wedi wynebu o'r blaen.

"Pa un bynnag, os ydynt yn dod ymlaen a chael effaith ar y gêm neu'n dechrau a phara am awr neu 90 munud, maen nhw'n chwaraewyr talentog.

"Ry'n ni wedi derbyn beirniadaeth, a digon teg oherwydd y canlyniadau a dyna'r math o fusnes ry'n ni'n gweithio yno.

"Ry'n ni'n ddigon mawr i ysgwyddo hynny - dyw e ddim yn broblem - a nawr fe wnawn ni' fwrw 'mlaen."

Pynciau cysylltiedig

Straeon perthnasol