Ffigyrau gwrando hwyr Radio Cymru 'wedi dyblu' ddiwedd 2022

Mae Caryl yn cyflwyno gyda'r hwyr bob nos Lun i nos Iau ar Radio Cymru

Fe wnaeth y niferoedd sy'n gwrando ar Radio Cymru gyda'r hwyr "ddyblu" yn chwarter olaf y llynedd, yn ôl pennaeth yr orsaf.

Cafodd sawl newid eu cyflwyno i'r amserlen, gyda Caryl Parry Jones yn gyflwynydd newydd i'r slot rhwng 21:00 a hanner nos yn lle Geraint Lloyd, oedd yn cyflwyno rhwng 22:00 a 00:00.

Pan gafodd y newid hwnnw ei gyhoeddi, bu protestio yn erbyn y penderfyniad.

Dywedodd llefarydd ar ran BBC Cymru fod y ffigyrau'n "galonogol" a'u bod yn "falch o bob cyfle i glywed ymateb y gynulleidfa".

• Cynnal protest i geisio achub rhaglen Geraint Lloyd

• Pennaeth Radio Cymru yn amddiffyn newid amserlen

• Caryl Parry Jones i gyflwyno rhaglenni hwyr Radio Cymru

Roedd Dafydd Meredydd, golygydd Radio Cymru, yn siarad ynglŷn â lansio rhaglen newydd ar y celfyddydau o fis Ebrill, gyda'r awdur a'r actor Ffion Dafis yn cyflwyno.

Daeth cyhoeddiad hefyd y bydd Hywel Gwynfryn yn camu'n ôl o gyflwyno ei raglen wythnosol ar y Sul.

Fe ddaeth tua 60 o bobl i brotestio yn Aberystwyth y llynedd dros y penderfyniad i gael gwared ar raglen Geraint Lloyd

Gyda sawl newid i'r amserlen yn cael eu cyhoeddi y llynedd, fe gafodd yr orsaf ei beirniadu gan rai am ddod â rhaglen benodol ar y celfyddydau - Stiwdio - i ben.

Tua'r un adeg, fe gafodd deiseb ei chyflwyno i gadw rhaglen hwyr Geraint Lloyd, gyda rhai yn protestio hefyd.

Dywedodd Radio Cymru ar y pryd eu bod yn "gorfod edrych o'r newydd ar ei hallbwn a sicrhau y gwerth gorau am arian i'n cynulleidfa".

'Ffigyrau hwyr wedi dyblu'

Fore Llun ar Dros Frecwast, dywedodd Mr Meredydd fod ffigyrau gwrando'r orsaf wedi codi'n gyffredinol.

Roedd nifer y gwrandawyr rhwng 21:00 a hanner nos, meddai, "wedi dyblu" yn chwarter olaf y llynedd o'i gymharu â'r chwarter blaenorol.

Fe ddechreuodd Caryl gyflwyno ei rhaglen bob nos Lun i nos Iau ym mis Hydref.

Fe wnaeth Dafydd Meredydd longyfarch tîm rhaglen Caryl ar eu ffigyrau

"Mi gaethon ni'r ffigyrau ar gyfer chwarter ola' 2022 ryw wythnos neu ddwy yn ôl... ac yn dangos fod nifer y gwrandawyr wedi codi eto felly diolch yn fawr iawn i'r holl wrandawyr," dywedodd.

"Ar gyfartaledd yn 13 awr a hanner yr wythnos i bob gwrandawr - mae hynny'n syfrdanol, mae'n 1.8 miliwn awr o wrando yr wythnos."

Dywedodd bod rhai rhaglenni'n "gwneud yn ardderchog" fel rhaglen Aled Hughes, Post Prynhawn a rhaglen newydd Caryl Parry Jones.

"Llongyfarchiadau i dîm Caryl Parry Jones, mae'n ddyddiau cynnar iawn i'r rhaglen yna ond mae'r [ffigyrau] RAJAR diweddara' yn dangos fod y gynulleidfa rhwng 21:00 a hanner nos wedi dyblu ers y chwarter blaenorol."

'Trafod syniadau yn gyson'

Mewn datganiad, dywedodd llefarydd ar ran BBC Cymru: "Fel y gwnaeth Dafydd Meredydd ei grybwyll bore heddiw ar raglen Dros Frecwast, mae ffigyrau RAJAR diweddaraf Radio Cymru yn galonogol gyda chynnydd yng nghyrhaeddiad wythnosol yr orsaf ac yn y nifer oriau mae'r gynulleidfa yn gwrando.

"Rydym yn falch o bob cyfle i glywed ymateb y gynulleidfa ac yn trafod syniadau a chynlluniau gyda phartneriaid yn gyson.

"Rydym yn edrych ymlaen at glywed y rhaglen gelfyddydol newydd yn setlo i'r amserlen."