Cyn-flaenwr Cymru â 'chyflwr meddygol difrifol'

Fis Ionawr arwyddodd Ched Evans gytundeb newydd gyda Preston i'w gadw gyda'r clwb tan haf 2024

Mae clwb Preston North End wedi cyhoeddi fod cyn-chwaraewr Cymru, Ched Evans, angen llawdriniaeth ar ôl datblygu "cyflwr meddygol difrifol" o ganlyniad i "gyswllt grymus parhaus" yn ystod ei yrfa.

Yn ôl y clwb mae'r blaenwr 34 oed, sydd wedi sgorio naw gwaith y tymor hwn, yn wynebu "canlyniadau all newid ei fywyd".

Mewn datganiad, dywedodd Preston eu bod wedi ymgynghori gydag arbenigwyr mwyaf blaenllaw'r wlad dros yr wythnos ddiwethaf.

"Mae pawb yn obeithiol y bydd Ched yn ôl yn chwarae ac yn sgorio mewn crys PNE yn y dyfodol," meddai'r clwb.

"Yn fwy cyffredin ymhlith chwaraewyr rygbi a phêl-droed Americanaidd, mae'r cyflwr angen llawdriniaeth i fynd i'r afael â'i symptomau presennol ac i atal unrhyw ddifrod pellach rhag digwydd yn y dyfodol."

Yn enedigol o'r Rhyl, enillodd Ched Evans 13 cap i Gymru rhwng 2008 a 2011

Mae cyn-chwaraewr rhyngwladol Cymru Evans wedi methu'r ddwy gêm ddiwethaf gydag anaf i'w wddf.

"Mae wedi bod i weld yr arbenigwyr gorau a bydd yn cael llawdriniaeth rhyw adeg yn fuan," meddai datganiad y clwb.

Dywedodd y rheolwr, Ryan Lowe, wrth BBC Radio Lancashire: "Rydyn ni'n mynd i aros i weld sut mae'n gwella.

"Fe wnawn ni'r holl bethau iawn i'w gael yn ôl ar y gwair, ond ei iechyd yw'r peth pwysicaf. Mae wedi cael hyn ers cwpl o flynyddoedd lle mae wedi teimlo effeithiau'r bangs.

"Rwy'n cael lwmp yn fy ngwddf pan rwy'n meddwl am y peth. Mae'n siomedig nad yw'n gallu helpu'r hogiau rhwng nawr a diwedd y tymor.

"Mae'n iawn ac mae'r newyddion yn well na'r hyn yr oedden ni'n ei feddwl, oherwydd bydd yn cael llawdriniaeth ac mae siawns dda y bydd yn gwisgo crys Preston North End eto."