Gwrthdrawiad ysbyty Llwynhelyg: Plentyn yn ddifrifol wael

Mae plentyn bach yn parhau mewn cyflwr difrifol yn dilyn gwrthdrawiad ger ysbyty yn Hwlffordd, Sir Benfro ddydd Mercher.

Yn dilyn y gwrthdrawiad rhwng car a phobl ger Ysbyty Llwynhelyg, cafodd y plentyn ei gludo mewn ambiwlans awyr i ysbyty yng Nghaerdydd.

Cadarnhaodd yr heddlu bod y plentyn yn ddifrifol wael.

Mae gyrrwr y car yn parhau i dderbyn triniaeth am anafiadau difrifol, ac mae dau berson arall a gafodd eu cludo i'r ysbyty wedi eu rhyddhau.

Mae rhieni'r plentyn yn derbyn cymorth gan swyddogion arbenigol.

Cafodd BMW gwyn oedd wedi bod mewn gwrthdrawiad ei dynnu o'r safle brynhawn Mercher

Cafodd y gwasanaethau brys eu galw toc cyn 12:00 ddydd Mercher, a dywedodd Heddlu Dyfed-Powys eu bod yn parhau i ymchwilio i amgylchiadau'r digwyddiad.

Fe wnaeth swyddogion barhau ar y safle am rai oriau.

Dywedodd yr heddlu eu bod yn deall effaith "frawychus" digwyddiadau o'r fath ar y gymuned, gan ychwanegu y bydd timau lleol yn cynnig cefnogaeth dros y dyddiau ac wythnosau nesaf.