URC yn cyhoeddi polisi i 'wella defnydd o'r Gymraeg'

Mae Undeb Rygbi Cymru wedi dweud y byddan nhw'n gwella y defnydd o'r Gymraeg o fewn y sefydliad.

Ar faes y Sioe Fawr yn Llanelwedd, cyhoeddodd prif weithredwr dros dro'r undeb bolisi iaith newydd.

Mae'n ymrwymo i "gynnydd sylweddol yn y ddarpariaeth sy'n cael ei gynnig i'r cyhoedd".

Dywedodd Comisiynydd y Gymraeg fod URC yn chwarae rhan fawr ym mywyd Cymru a'i bod yn "croesawu'n fawr yr ymrwymiad i'r Gymraeg".

• Siop URC: Addo arwyddion dwyieithog

• Sut daeth Cymreictod a’r iaith i galon stori pêl-droed Cymru

Yn ôl llefarydd ar ran URC, bydd prif gyhoeddiadau'r undeb, gan gynnwys y prif ddatganiadau i'r wasg, adroddiadau gemau rhyngwladol a straeon newyddion mawr eraill ar gael yn Gymraeg a Saesneg.

Bydd cynnydd yn nefnydd y Gymraeg yn fewnol hefyd yn cael "ei argymell a'i annog," medd llefarydd.

Ychwanegon hefyd y bydd ymrwymiad cadarn i arwyddion newydd a pherthnasol o amgylch Stadiwm Principality fod yn ddwyieithog.

Bydd cyhoeddiadau a chyfathrebiadau eraill sy'n cael eu cynhyrchu gan URC, gan gynnwys rhaglenni gemau rhyngwladol ac amrywiaeth o ddarpariaeth ar-lein, dywedon, yn hyrwyddo'r defnydd o'r Gymraeg.

Nigel Walker yn lansiad y polisi iaith newydd yn y Sioe Fawr ddydd Llun

Dywedodd Nigel Walker, Prif Weithredwr dros dro Undeb Rygbi Cymru: "Mae ystyried a hyrwyddo'r Gymraeg ym mhopeth a gynigwn i'n cyhoedd yn ymrwymiad dyddiol i sefydliad sydd wrth galon ein cenedl.

"Byddwn yn gwella ein darpariaeth a'n gwasanaethau ac yn croesawu'r cyfleoedd newydd y bydd hyrwyddo'r Gymraeg yn eu cynnig i ni a'n cefnogwyr."

Clywed y Gymraeg 'yn naturiol ymhobman'

Yn lansiad y polisi newydd ddydd Llun, fe gafodd yr ymrwymiad ei gydnabod gan swyddfa Comisiynydd y Gymraeg trwy dderbyn statws 'Cynnig Cymraeg'.

Dywedodd Efa Gruffudd Jones, Comisiynydd y Gymraeg: "Mae angen i'r Gymraeg gael ei chlywed yn naturiol ymhobman, boed hynny yn gymunedol, yn y maes celfyddydol ac wrth gwrs yn y byd chwaraeon.

"Mae Undeb Rygbi Cymru yn chwarae rhan fawr ym mywyd Cymru - ac rwy'n croesawu'n fawr yr ymrwymiad sy'n cael ei gyhoeddi heddiw i'r Gymraeg.

"Rwy'n arbennig o falch o allu rhoi cymeradwyaeth i'w Cynnig Cymraeg, ac edrychaf ymlaen at gydweithio'n agos gyda'r Undeb wrth i'w cynlluniau gael eu datblygu."

Mae Undeb Rygbi Cymru hefyd wedi cadarnhau y bydd yn gweithio gyda'r Ganolfan Dysgu Cymraeg Genedlaethol i ddarparu hyfforddiant i'w staff.

Dywedodd yr undeb bod dros 100 o aelodau staff wedi dweud eu bod nhw eisiau dysgu'r iaith neu gryfhau eu sgiliau Cymraeg.