'Diolch byth' - Rhyddhad i Gymru wedi 'clasur' Fiji

Cefnogwyr Cymru yn canu Calon Lân yn Bordeaux

Roedd hi'n "glasur o gêm" yn ôl y sylwebydd rygbi Cennydd Davies, a Chymru'n trechu Fiji o drwch blewyn yn dilyn amddiffyn arwrol ar ddiwedd yr 80 munud.

Dyma gêm orau Cwpan y Byd hyd yma medd rhai, yn llawn "ceisiau, cardiau, digwyddiadau dramatig, tensiwn, tyndra, ysbryd cymeriad - pob dim".

Roedd 'na nerfau ar y cae ac yn yr eisteddle tua diwedd y gêm, wrth i'r ynyswyr bwyso am y cais fyddai wedi gallu hawlio'r pwyntiau i gyd, ond diolch i amddiffyn cadarn a chamgymeriad tyngedfennol gan Semi Radradra - Cymru aeth â hi.

Dyma oedd y farn ger y stadiwm wedi'r gêm.

Roedd y canlyniad yn ryddhad i Owain a Hanna oedd allan yn Bordeaux

"Diolch byth bo' ni 'di ennill", oedd ymateb Owain Davies o Lanelli ger y Nouveau Stade de Bordeaux nos Sul.

"O'n i'n meddwl o'n nhw 'di wharae'n dda iawn. Y pac yn yr hanner cyntaf wedi chwarae'n andros o dda.

"O'n i'n poeni bach ar ôl i'r fainc ddod arno, o'n ni 'di gwanhau bach, ond o'dd e'n wych i ddod dros y llinell yn y diwedd, andros o gêm dda, o'dd Fiji 'di chwarae'n wych hefyd. "

Tebyg oedd ymateb Hanna Merrigan o Bontyberem: "O'n ni yng nghanol ffans Fiji a gweud y gwir - eitha nerfus - ond fi'n falch o'dd Cymru wedi ennill yn y pendraw."

Teuluoedd Liam Williams, Tomos Williams a Taulupe Faletau yn dathlu'r fuddugoliaeth tu allan i'r stadiwm

Hefyd ymhlith y miloedd yn y stadiwm roedd teuluoedd Liam Williams, Tomos Williams a Taulupe Faletau.

"Roedd hi mor agos - gêm wych. Roedd fy nghalon i'n mynd fel rhywbeth gwyllt!" meddai mam Liam Williams, Jane.

"Ond rwy'n credu fod Liam a'r bechgyn i gyd wedi chwarae'n dda.

Dywedodd bod ei nerfau'n "ofnadwy" ar y diwedd. "Do'n i methu edrych!"

"Ond fe gafon ni'r fuddugoliaeth, ac ry'n ni am fynd yr holl ffordd ac ennill y cwpan - mae'n rhaid i chi gredu!"

Mae Ifan, chwith, yn hyderus am obeithion Cymru yn dilyn y fuddugoliaeth

Roedd Nerys a'i theulu o Landeilo yn Ffrainc yn gwylio'r gêm: "O'dd hi'n waith caled! O'dd hi'n gyffrous... ond 'naethon ni waith caled ohoni."

Dywedodd ei mab, Ifan: 'Na'r gêm anoddaf yn y grŵp fi'n meddwl, gallen ni fynd i'r chwarteri, falle'r haneri."

'Bydd pawb arall yn poeni'

Ychwanegodd Pamela o Lanharan, Rhondda Cynon Taf: "Gwych - am gêm!

"Gallai fod wedi mynd unrhyw ffordd - roedd hi mor gyffrous!"

"Rwy'n credu, nawr ein bod ni wedi trechu Fiji, y bydd pawb arall yn poeni," meddai Pamela

"Ond llwyddon ni i ddal ein gafael ynddi, ac ymlaen â ni at y nesaf.

"Roedd hi mor nerfus [yn y diwedd]. Ond roedd hi'n gêm wych. Nes i fwynhau'n fawr ac roedd hi bendant werth dod.

"Rwy'n credu, nawr ein bod ni wedi trechu Fiji, y bydd pawb arall yn poeni."

Ond nid pawb yn y stadiwm oedd wedi mwynhau'r profiad!

Dywedodd Rhodri Sion o Gastell-nedd bod Cymru wedi bod yn "arbennig, naethon nhw roi eu cyrff ar y lein".

Ond: "Alla i ddim dweud bo fi 'di mwynhau'r gêm o gwbl, tan yr eiliad ola' pan naethon nhw ryddhau'r bêl!

"Ymlaen i'r ffeinal efallai?"

Roedd y nerfau'n rhacs i Rhodri Sion (ail o'r dde) a Tudur Jones (chwith) yn y stadiwm

Un arall yn yr un gwch oedd Tudur Jones o Drebanws: "Wel, odd e'n rhyddhad ar y diwedd!

"Cymaint o fygythiad 'da Fiji ond yn y pendraw, 'oedd ein amddiffyn ni'n wych, ymlaen nawr i Nice yn erbyn Portiwgal."

Dywedodd John Jackson (chwith) fod Cymru wedi "gwneud pethau'n anodd i'w hunain"

Dywedodd John Jackson o Rhisga, Sir Caerffili, fod Cymru'n lwcus yn y diwedd i ddal eu gafael yn y fuddugoliaeth.

"Fe wnaethon nhw bethau'n anodd i'w hunain - gadael hi tan y munud olaf a bron ei thaflu hi i ffwrdd, ond roedden ni'n lwcus.

"Dydyn ni ddim am fynd o flaen gofid, ond pam lai mynd amdani?"

Gweddill gemau Cymru yng Nghwpan y Byd

Cymru v Portiwgal, Nice - 16:45 (amser Cymru) dydd Sadwrn, 16 Medi

Cymru v Awstralia, Lyon - 20:00 dydd Sul, 24 Medi

Cymru v Georgia, Nantes - 14:00 dydd Sadwrn, 7 Hydref

Pynciau cysylltiedig

Straeon perthnasol