Cynghrair y Cenhedloedd: Gwlad yr Iâ 1-0 Cymru

Roedd yn berfformiad cryf gan Gymru yng ngêm gyntaf y gynghrair er iddynt gael eu trechu gan Wlad yr Iâ

Cafodd Cymru eu trechu gan Wlad yr Iâ yn eu gêm gyntaf yng Nghynghrair y Cenhedloedd nos Wener.

Er perfformiad cryf gan y menywod o Gymru roedd gôl yn yr hanner cyntaf gan gapten y tîm cartref yn ddigon i ennill y fuddugoliaeth iddynt.

Cafodd Cymru sawl cyfle ar ddechrau'r gêm, ac roedd y tîm yn ymddangos mewn sefyllfa gref wrth iddynt ennill y gornel gyntaf.

Ond Gwlad yr Iâ sgoriodd gyntaf gyda'r capten Glodis Viggosdottir yn penio'r bêl i'r gôl oddi ar gic o'r gornel.

Er bod y tîm cartref ar y blaen gorffennodd Cymru'r hanner cyntaf yn gryf gydag ymgais tuag at y gôl gan Carrie Jones yn cael ei arbed gan y golwr.

Ar ddechrau'r ail hanner roedd Cymru i weld wedi colli ychydig o hyder, ond wrth i'r hanner fynd yn ei flaen llwyddodd yr ymwelwyr i roi tipyn o bwysau ar amddiffynwyr Gwlad yr Iâ.

Ond er eu perfformiad cryf methodd Cymru â chipio pwynt gan adael y sgôr yn 1-0 erbyn diwedd y gêm.

Bydd gêm nesaf Cymru nos Fawrth, wrth iddynt herio Denmarc yn Stadiwm Dinas Caerdydd.