Cwpan Rygbi'r Byd: Cymru'n trechu Awstralia o 40-6

Sgoriodd Gareth Davies cais cyntaf Cymru o fewn tair munud

Mae Cymru wedi ennill eu lle yn rownd yr wyth olaf Cwpan Rygbi'r Byd wedi buddugoliaeth yn erbyn Awstralia.

Gwnaeth tri chais gan Gareth Davies, Nick Tompkins a Jac Morgan, a chiciau cosb cyson Gareth Anscombe sicrhau buddugoliaeth gyfforddus i dîm Warren Gatland.

Dechreuodd Cymru yr hanner cyntaf yn gryf, gyda Davies yn croesi o fewn tair munud.

Wedi tafliad o'r lein gan Aaron Wainwright cyrhaeddodd y bêl ddwylo Morgan, a rhedodd heibio i dri o chwaraewyr Awstralia, cyn pasio at Davies i dirio wrth y pyst.

Ymatebodd Awstralia yn fuan gyda dwy gic gosb gan Ben Donaldson i gau'r bwlch.

Roedd angen newid cynnar i Gymru, gyda Gareth Anscombe yn cymryd lle Dan Biggar, wedi iddo ddioddef anaf.

Tarodd Gareth Anscombe y pyst gyda'i gic gosb gyntaf ond roedd yn llwyddiannus gyda'i ail gan roi triphwynt arall i Gymru.

Roedd cicio Gareth Anscombe yn hollbwysig i fuddugoliaeth Cymru

Roedd Awstralia yn rhoi tipyn o bwysau ar Gymru ar adegau yn ystod yr hanner ond roedd y dynion mewn coch yn edrych yn hyderus wrth amddiffyn.

Gwnaeth dwy gic gosb arall gan Anscombe rhoi Cymru 10 pwynt ar y blaen, ac eiliadau cyn yr hanner roedd yn edrych fel y byddai pas gan George North i Louis Rees-Zammitt yn sicrhau ail gais i Gymru - ond llwyddodd Awstralia i'w ddal i fyny, gyda'r sgôr yn 16-6 ar yr egwyl.

Dechreuodd yr ail hanner gyda chic gosb lwyddianus arall gan Anscombe, cyn i Nick Tompkins sgorio ail gais Cymru, gyda rhediad berffaith i ddal y bêl oddi ar gic fach gan Anscombe dros bennau chwaraewyr Awstralia.

Gwnaeth tacl uchel a chamsefyll arwain at ddwy gic gosb arall, cyn i Anscombe gicio gôl adlam gan sicrhau sgôr uchaf Cymru erioed mewn gêm yn erbyn Awstralia a gwobr seren y gêm i'w hun.

Roedd cais arall ym munudau olaf y gêm gan y capten Jac Morgan i selio'r fuddugoliaeth i Gymru, gyda'r golled yn golygu bod Awstralia allan o'r bencampwriaeth oni bai bod canlyniadau eraill yn mynd o'u plaid.

Nick Tompkins sgoriodd ail gais Cymru

Mae'r fuddugoliaeth yn golygu bod Cymru yn rownd yr wyth olaf, gyda Fiji yn unig yn medru eu disodli o frig grŵp C.

Ar ddiwedd y gêm dywedodd Warren Gatland: "Roeddwn yn hapus iawn gyda sawl peth heno.

"Dwi'n credu ein bod wedi bod yn glinigol o ran rheoli'r gêm, a chymryd ein pwyntiau ac roeddwn yn hapus na wnaethon ni ildio cais o gwbl.

"Mae'r tîm yma yn gwella gyda momentwm a hyder ac rydym mewn lle da ar hyn o bryd," meddai.

Dywedodd Jac Morgan: "Ni wedi chwarae'n dda yn y ddwy gêm olaf, dwi'n credu heddi, roedd ein disgyblaeth ni yn well.

"Roedd lot o hyder yn mynd fewn i'r gêm, roedd yn dangos heddi gyda'r perfformiad ail hanner, roedd y bois yn grêt."