Llafur yn methu ymrwymo i gyllid HS2 i Gymru

Dyw'r Blaid Lafur heb ymrwymo i ddarparu cyllid canlyniadol i Gymru am y cymal cyntaf o HS2, yn dilyn y penderfyniad i ganslo ail ran rhwng Birmingham a Manceinion.

Roedd Llywodraeth y DU wedi dynodi HS2 fel prosiect Lloegr a Chymru oherwydd roedd Cymru yn cael ei ystyried fel elwa o reilffordd cyflym i orsaf Crewe.

Oherwydd rheolau datganoli fformiwla Barnett, mae'r Alban a Gogledd Iwerddon wedi derbyn arian o ganlyniad i'r gwariant ar HS2, ond nid felly i Gymru.

Yn siarad ar raglen BBC Politics Wales dywedodd Ysgrifennydd Gwladol Cysgodol Cymru, Jo Stevens, y byddai llywodraeth Lafur yn San Steffan yn "gweithio allan anghenion Cymru o ran trafnidiaeth."

Ond ni wnaeth gadarnhau a fyddai Cymru'n derbyn canran o'r arian a'i wariwyd eisoes rhwng Llundain a Birmingham.

Mae wedi ei amcangyfrif y byddai'r cyllid canlyniadol am gymal cyntaf HS2 tua £2biliwn.

Dywedodd llefarydd Llafur dros Gymru, Jo Stevens, y byddai llywodraeth Lafur yn San Steffan yn "gweithio allan anghenion Cymru o ran trafnidiaeth."

Dywedodd Ms Stevens: "Diddordebau pobl Cymru'n sy'n teithio a phobl sy'n teithio ar draws y ffin bydd ein blaenoriaeth."

Cafodd ail gymal HS2, rhwng Birmingham a Manceinion, ei ganslo gan y Prif Weinidog, Rishi Sunak, yng nghynhadledd y Ceidwadwyr ddydd Iau.

Cyhoeddodd y byddai £1biliwn yn cael ei roi tuag at drydaneiddio rheilffordd gogledd Cymru yn ei le.

• Trydanu rheilffordd y gogledd yn sgil cwtogi HS2

• Pryderon fod Cymru'n cael llai o arian yn sgil HS2

Mae'n siŵr bod Llafur wedi derbyn hwb arall i'w hyder wrth edrych tuag at yr etholiad nesaf wedi iddynt ennill sedd Rutherglen a Gorllewin Hamilton yn ddiweddar.

Ond mae rhai wedi cyhuddo arweinwyr Llafur o wthio allan aelodau ar adain chwith y blaid

Mae'r AS Llafur, Beth Winter, a oedd yn gefnogol o Jeremy Corbyn, wedi galw am adolygiad o'r ffordd cafodd yr ymgeisydd am yr etholaeth newydd Merthyr Tydfil a Cynon uchaf ei ddewis, wedi iddi golli mewn gornest yn erbyn Gerald Jones.

Gerald Jones enillodd yn erbyn Beth Winter yn y broses ddethol ym mis Mehefin

Dywedodd Ms Stevens fod y broses yn deg a bod aelodau wedi "gwneud eu penderfyniad."

Ychwanegodd: "Gwnaeth aelodau yn yr etholaeth newydd yna cymryd rhan, gyda'r niferoedd uchaf rydyn ni wedi'u gweld, ac mi wnaethon nhw eu dewis. Yn anffodus i Beth, hi ddaeth yn ail.

"Dwi'n teimlo trueni drosti... ond roedd yn broses deg."

Mae BBC Politics Wales ar gael i'w wylio ar BBC iPlayer.