Gwahardd cynghorydd ar ôl sylwadau am argyfwng Israel-Gaza

Nid yw cyfrif X Miqdad Al-Nuaimi ar gael bellach

Mae cynghorydd Llafur yng Nghasnewydd wedi'i wahardd ar ôl sylwadau a wnaeth am argyfwng Israel-Gaza.

Mae GB News wedi adrodd bod Miqdad Al-Nuaimi wedi postio ar X - Twitter gynt - am bolisi diogelwch Israel yn Gaza.

Mae'r Blaid Lafur yn ymchwilio, ac nid yw cyfrif X Mr Al-Nuaimi ar gael bellach.

Mae'r BBC wedi cysylltu â Mr Al-Nuaimi, sydd wedi bod yn gynghorydd ers 2000, ond dywedodd nad yw'n gallu gwneud sylw.

Mae Mr Al-Nuaimi bellach wedi'i wahardd rhag bod yn aelod o'r Blaid Lafur tra bod ymchwiliad yn cael ei gynnal.

Dywed y Blaid Lafur na all wneud sylw ar achosion unigol oherwydd bod ei gweithdrefn ddisgyblu yn gyfrinachol.