Trefforest: Pedwar yn y llys wedi llofruddiaeth Daniel Rae

Dyn a ddau fachgen yn ymddangos yn y llys ar gyhuddiad o lofruddio Daniel Rae

Mae dyn a dau fachgen yn eu harddegau wedi ymddangos yn Llys y Goron Caerdydd ar gyhuddiad o lofruddiaeth Daniel Rae yn Nhrefforest.

Mae Kieran Carter, 22, a dau fachgen 17 oed na ellir eu henwi, wedi eu cyhuddo o'r ymosodiad ar Stryd y Dywysoges yn Nhrefforest ar 17 Rhagfyr.

Mae pedwerydd person, Grace Dresser, 21 oed, wedi ei chyhuddo o gynorthwyo troseddwr a gwyrdroi cwrs cyfiawnder.

Fe ymddangosodd Mr Carter a Ms Dresser yn Llys y Goron Caerdydd, tra ymddangosodd y ddau yn eu harddegau drwy gyswllt fideo.

Kieran Carter yn gadael Llys y Goron Caerdydd

Clywodd y llys fod yr heddlu'n gweithio trwy lawer o dystiolaeth fforensig, teledu cylch cyfyng a thystiolaeth ffôn.

Fe wnaeth y Barnwr Tracey Lloyd-Clarke gadw'r oedolion yn y ddalfa. Cafodd y bobl ifanc eu cadw mewn llety diogel dan ofal yr awdurdod lleol.

Mae disgwyl i Mr Carter, o Birmingham, a Ms Dresser, o Drefforest, a'r ddau fachgen 17 oed ymddangos eto ddiwedd Ionawr i gyflwyno ple.

Mewn teyrnged yn dilyn marwolaeth Daniel Rae, 30 oed, dywedodd y teulu eu bod nhw wedi "digalonni'n llwyr".

Fe ychwanegon nhw fod angen amser i alaru a dod dros y sioc o golli Daniel "yn y ffordd erchyll yma".

Fe blediodd Heddlu De Cymru i unrhyw dystion neu unrhyw un â gwybodaeth i gysylltu.