Seiont Manor: Ailddatblygu gwesty 'i greu 50 o swyddi'

Llun artist o'r safle wedi ei weddnewid

Fe all cynllun i ailddatblygu gwesty yng Ngwynedd greu 50 o swyddi, medd datblygwyr.

Ddydd Llun nesaf bydd Pwyllgor Cynllunio Cyngor Gwynedd yn trafod cynlluniau i ehangu gwesty'r Seiont Manor yn Llanrug, ger Caernarfon.

Collodd tua 35 o bobl eu swyddi pan gaeodd y gwesty moethus yn 2020.

Ond nawr bydd cynghorwyr yn ystyried cynlluniau i ehangu'r safle drwy adeiladu 28 ystafell wely ychwanegol - fyddai'n golygu cyfanswm o 61 o ystafelloedd gwely i westeion.

• Cynlluniau i ailagor ac ehangu gwesty Seiont Manor

• Seiont Manor yn nwylo'r derbynwyr

• Gwesty moethus yn canslo cinio Nadolig

Byddai'r cynlluniau hefyd yn cynnwys adeiladu 39 o gabannau gwyliau, a gwelliannau i'r cyfleusterau i westeion gan gynnwys cyrtiau tenis, bloc llety staff, llefydd parcio ychwanegol ac ystafell biomas.

Yn ôl y datblygwyr, byddai swyddi rheolaeth hefyd ar gael, gyda blaenoriaeth i gyn-weithwyr y gwesty.

Mae swyddogion cynllunio yn argymell cymeradwyo'r cynlluniau gyda'r ymgeiswyr, Caernarfon Properties Ltd, yn awgrymu byddai'r datblygiad yn creu 50 o swyddi.

Pryderon lleol

Er hyn mae'r cynigion wedi denu gwrthwynebiad gan Gyngor Cymuned Llanrug, sydd wedi mynegi pryderon am y cynnydd tebygol mewn traffig, gan ddweud bod maint y datblygiad yn "anaddas i'r ardal".

Roedd pryderon a godwyd yn ystod yr ymgynghoriad cyhoeddus hefyd yn cynnwys materion priffyrdd, sylwadau bod digonedd o ddarpariaeth llety gwyliau eisoes yn yr ardal, a bod y datblygiad yn "debygol o arwain at gynnydd yn y galw am ail gartrefi ac unedau gwyliau hunanarlwyo, cynnydd mewn prisiau eiddo, mewnfudo a phroblemau ynghylch diffyg tai fforddiadwy".

Fe gaeodd gwesty Seiont Manor yn 2020

Ond mae adroddiad swyddogion cynllunio'r cyngor yn argymell caniatáu gydag amodau, gan ddweud byddai'r "datblygiad yn cynnig twristiaeth o safon a fydd yn cefnogi economi'r ardal".

Maent hefyd yn dod i'r casgliad y byddai'n cynnig "effaith llesol cyffredinol ar y Gymraeg yn yr ardal" ac yn "cefnogi'r economi leol tra'n hyrwyddo cymuned Gymraeg gynaliadwy".

Mae disgwyl penderfyniad pan fydd Pwyllgor Cynllunio Cyngor Gwynedd yn cyfarfod ddydd Llun, 26 Chwefror.