Arestio dau arall mewn cysylltiad â llofruddiaeth ger Pontypridd

Mae dau berson arall wedi cael eu harestio mewn cysylltiad â llofruddiaeth dyn 22 oed yn ardal Pontypridd.

Cafodd yr heddlu eu galw toc cyn 00:40 fore Mawrth yn dilyn digwyddiad ar Poets Close, Rhydyfelin.

Bu farw Liam Woolford, o Borth yn Rhondda Cynon Taf, ar ôl cael ei anafu yn y digwyddiad.

Cafodd dau ddyn arall eu trin yn yr ysbyty wedi'r digwyddiad, ond maen nhw - dyn 23 oed o Rydyfelin, a dyn 24 oed o Borth - bellach wedi eu harestio ar amheuaeth o lofruddiaeth.

Mae dyn 30 oed o Rydyfelin a gafodd ei arestio ar amheuaeth o lofruddiaeth ac o geisio llofruddio, a dyn 22 oed o Donteg a gafodd ei arestio ar amheuaeth o lofruddiaeth, yn parhau yn y ddalfa.

Ond, mae menyw 20 oed o Ben-y-graig gafodd ei harestio ar amheuaeth o anafu'n fwriadol wedi cael ei rhyddhau ar fechnïaeth tra bod ymholiadau'n parhau.

Hoffai'r heddlu ddiolch i gymuned Rhydyfelin am eu cefnogaeth yn ystod yr ymchwiliad.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.