Sut i ddiddanu'r plant dros y gwyliau

Gyda phob tegan bellach yn 'boring', a'r wythnosau heb ysgol yn ymestyn yn hir o'ch blaenau, beth fydd yn cadw'r plant yn hapus dros y gwyliau?

Dyma ychydig o syniadau gan Cymru Fyw am beth fydd yn sicrhau bod y plantos yn ddistaw am ychydig... gobeithio.

• S4C Cyw

Mae'r wefan yn llawn rhai o'u hoff raglenni teledu, gemau gwych a chaneuon anhygoel fydd yn aros yn y cof (am ychydig yn rhy hir).

I blant ychydig yn hŷn, mae gwefan Stwnsh hefyd yn llawn rhaglenni, gemau a fideos gwyllt a gwirion.

• Y Pod

Beth am bodlediad Cymraeg addas ar gyfer plant? Mae yna gasgliad o rai i blant o bob oed ar wefan Y Pod, o Stori Tic Toc i'r plant lleiaf, i bodlediad Cylchgrawn Cip yr Urdd a phodlediadau gan ddisgyblion ysgol uwchradd ar gyfer y plant hŷn.

• Sôn am Lyfra

Eisiau llyfrau newydd i'r plantos, ond ddim yn siŵr beth fyddai at eu dant? Mae gwefan Sôn am Lyfra yn adolygu llyfrau plant, felly gewch chi syniad da o beth fyddai'n addas cyn mentro i'r siop lyfrau leol.

• Fideos Cymru FM

Y gwyliau yw'r amser delfrydol i ddysgu sgil newydd, ac mae gan sianel YouTube Cymru FM nifer o fideos allai helpu, o ddysgu sut i arddio a bît-bocsio i chwarae Minecraft a phaentio wynebau.

• Miwsig y Siarter Iaith

Mae BBC Radio Cymru 2 yn rhoi rhestr wrando o ganeuon cyfoes Cymraeg at ei gilydd bob mis, sydd yn wych ar gyfer cael Disgo Cegin!

• Hansh ar YouTube

Ar gyfer y bobl ifanc-sydd-ddim-cweit-yn-oedolion yn eich cartref, mae digon o fideos sy'n trafod testunau amrywiol, o gerddoriaeth, byw gydag awtistiaeth, ffilmiau, iechyd meddwl, i bynciau ychydig mwy aeddfed hefyd.

• Ioga i blant

Mae nifer o blant yn gwneud ioga neu sesiynau meddwlgarwch yn yr ysgol y dyddiau yma, felly beth am barhau'r ymarfer gartref gyda fideos ioga sy'n addas i blant.

• Coginio

Hen bryd i'r plant ddatblygu eu sgiliau coginio, ac mae yna ryseitiau ar wefan Hoffi Bwyd, Casáu Gwastraff y gallan nhw eu coginio er mwyn gwneud rhywbeth blasus i'r teulu.

• Mentrau Iaith

Mae nifer o Fentrau Iaith ledled Cymru yn cynnal clybiau gofal a gweithgareddau dros wyliau'r haf, felly beth am edrych am ddigwyddiad sy'n cael ei gynnal gan eich Menter leol chi?

• Ymweld â safleoedd hanesyddol

Ar wefan Cadw mae rhestrau o syniadau am beth i'w wneud gyda'ch diwrnod allan; o'r 10 castell gorau i blant, i'r lleoedd gorau ar ddiwrnodau gwlyb. Diwrnod gyda'ch gilydd, awyr iach a chael dysgu am hanes yr un pryd - beth well?

Peidiwch ag anghofio chwaith am safleoedd Amgueddfa Cymru ledled y wlad. Ynghyd â'r arddangosfeydd parhaol, mae yna'n aml weithgareddau a digwyddiadau penodol i blant a theuluoedd dros y gwyliau ysgol a phenwythnosau.

• Nofio am ddim

Mae pyllau nofio ledled Cymru yn cynnal sesiynau am ddim i blant o dan 16 oed. Cofiwch wirio amseroedd gyda'ch canolfan hamdden ymlaen llaw, a chofiwch eich gwisg nofio!

• Hwyl yn yr awyr iach

Eisiau gadael y tŷ, ond ddim yn siŵr beth i'w wneud? Mae gan Cyfoeth Naturiol Cymru ddigon o awgrymiadau sut allwch chi gael hwyl yn yr awyr agored. Ewch i feicio mynydd, neu ddod o hyd i fywyd gwyllt mewn coedwigoedd, neu ffeindio'ch ffordd drwy ddysgu sut i gyfeiriannu.

• Dysgu am fyd natur

Mae Ymddiriedolaeth Natur Gogledd Cymru ac Ymddiriedolaeth Natur De a Gorllewin Cymru yn cynnal amryw o ddigwyddiadau fel dysgu am drychfilod a glöynnod byw, casglu sbwriel, saffari'r glannau, gweithdai crefftio a theithiau cerdded.

• Taith ar y trên

I ble bynnag ewch chi, mae taith ar y trên bob amser yn hwyl, ac mae plant o dan 11 oed, sydd yn teithio gydag oedolyn, yn cael teithio am ddim ar wasanaethau Trafnidiaeth Cymru, a phlant 11-15 yr un modd, ar adegau tawel.

• Dod o hyd i Dro Da

Gallwch ddod o hyd i lwybrau am dro pell ac agos, cyfarwydd ac anghyfarwydd yn grŵp Facebook Dro Da, gyda chyngor am le i barcio, os yw'n addas ar gyfer pram, pa mor anodd yw'r llwybr, a mwy.

• Gwyliau a dyddiau o hwyl

Ar wefan Croeso Cymru mae rhestrau o'r gwyliau a'r digwyddiadau sy'n digwydd ledled Cymru ym mis Gorffennaf a mis Awst. Mae yna hefyd restr o atyniadau sy'n addas i bobl ag awtistiaeth.

MWYNHEWCH!

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.