Terfysg Trelái: 17 o bobl yn y llys

Cafodd ceir eu rhoi ar dân a gwrthrychau, gan gynnwys tân gwyllt, eu taflu at yr heddlu yn yr anhrefn

Mae 17 o bobl wedi ymddangos yn y llys wedi eu cyhuddo o droseddau'n ymwneud â'r anhrefn gyhoeddus yn Nhrelái yng Nghaerdydd ym mis Mai 2023.

Cafodd heddlu terfysg a'r gwasanaethau brys eu galw i ardal Trelái ar 22 Mai y llynedd ar ôl i tua 100 i 150 o bobl ymgasglu wedi gwrthdrawiad angheuol yn yr ardal.

Bu farw Kyrees Sullivan, 16, a Harvey Evans, 15 yn y gwrthdrawiad.

Cafodd ceir eu rhoi ar dân a gwrthrychau, gan gynnwys tân gwyllt, eu taflu at yr heddlu.

O'r chwith i'r dde: Connor O'Sullivan, Harvey James, Jayden Baston a Jayden Wescott

Y rhai fu'n ymddangos yn y llys ddydd Iau wedi'u cyhuddo o derfysg (riot) oedd:

• Lianna Tucker, 18 o Drelái

• Michaela Gonzales, 26 o Drelái

• Jaydan Baston, 20 o Gaerau

• Harvey James, 18 o'r Tyllgoed

• Jumana Fouad, 18 o Drelái

• Jordan Webster, 28 o Drelái

• Kieron Beccano, 25 o Sain Ffagan

• Luke Williams, 30 o Drelái

• Jayden Westcott, 20 o Drelái

• Zayne Farrugia, 24 o Gaerau

• Kyle Telemaque, 18 o Drelái

• Connor O’Sullivan, 25 o Gaerau

• Callum O’Sullivan, 23 o Drelái

• Ashdon O’Dare, 26 o Drelái

• Jordan Bratcher, 26 o Lanisien

• Jamie Jones, 23 o Lanrhymni

• McKenzie Danks, 21 o Gaerau

O'r chwith i'r dde: Zayne Farrugia, Michaela Gonzales, Kyle Telemaque, Jumana Fouad a Luke Williams

Mae McKenzie Danks hefyd yn wynebu dau gyhuddiad o ymosod ar heddwas. Mae'n gwadu'r cyhuddiadau hynny.

Ni wnaeth yr un o'r diffynyddion gyflwyno ple i'r cyhuddiad o derfysg, ac fe gafon nhw oll eu rhyddhau ar fechnïaeth ddiamod cyn eu hymddangosiad nesaf yn Llys y Goron Caerdydd ar 21 Hydref.

Ond fe wnaeth un diffynnydd - Ryan Knight, 19 o Sblot - fethu ag ymddangos yn y llys, ac fe gafodd gwarant ei gyhoeddi ar gyfer ei arestio.

Cyn i’r gwrandawiad ddechrau, dywedodd y Barnwr Stephen Harmes fod yr achosion yn ymwneud ag anhrefn "o ganlyniad i ddau fachgen yn anffodus yn colli eu bywydau ar eu beic trydan".

“Mae wedi cymryd peth amser,” ychwanegodd.

32 o heddweision wedi'u hanafu

Yn amlinellu eu hachos yn erbyn y diffynyddion, dywedodd Alex Orndal KC ar ran yr erlyniad fod 33 o bobl wedi cael eu hanafu yn yr anhrefn - 32 o heddweision ac un aelod o'r cyhoedd.

Ychwanegodd fod amryw o bethau wedi cael eu taflu at yr heddlu, gan gynnwys cerrig, fframiau gwely a thân gwyllt.

Dywedodd fod un heddwas wedi cael ei daro gan "fom petrol", ond na chafodd unrhyw un anafiadau difrifol.

Mae disgwyl i ragor o bobl ymddangos yn y llys ddydd Gwener, wedi i Wasanaeth Erlyn y Goron gyhuddo 31 o bobl yr wythnos ddiwethaf.