Cyfyngu posib ar ble mae siopau yn cael arddangos bwydydd sothach

Byddai'r rheolau newydd yn cyfyngu ar ble mae cwmnïau'n cael arddangos bwydydd sothach mewn siopau

Fe allai archfarchnadoedd yng Nghymru gael eu gwahardd rhag arddangos bwydydd sothach ger mannau talu mewn siopau o fis Mawrth 2026.

Byddai'n rhaid symud bwydydd o'r fath o fynediadau siopau ac o hafanau gwefannau pe bai rheoliadau newydd Llywodraeth Cymru yn cael eu cymeradwyo fis nesaf.

Cafodd rhagor o wybodaeth am y cynigion - sydd hefyd yn cynnwys gwaharddiad ar gynigion amlbryniant ar gyfer bwydydd sy'n cynnwys lefelau uchel o siwgr a halen a chynigion ail-lenwi diodydd llawn siwgr - eu cyhoeddi ddydd Llun.

Dywedodd Ysgrifennydd Iechyd Cymru fod natur ein siopau "yn cael effaith ar y fath o fwyd a diod yr ydym ni yn ei brynu".

'Mwy o waith i'w wneud eto'

Nod y cynigion yw lleihau nifer y bobl sy'n prynu eitemau o'r fath mewn mannau gwerthu penodol gan fusnesau sy'n cyflogi 50 neu fwy o bobl.

Ni fyddai'r rheoliadau newydd yn effeithio ar siopau bach neu rhai sy'n arbenigo mewn un math o gynnyrch, megis siopau siocled neu felysion.

Fe allai busnesau sydd ddim yn cydymffurfio wynebu dirwyon o hyd at £2,500.

Yn ôl yr Ysgrifennydd Iechyd, Jeremy Miles, gan fod bron i chwarter plant Cymru dros eu pwysau neu'n ordew erbyn iddyn nhw ddechrau yn yr ysgol, "mae angen gweithredu er mwyn helpu pobl i wneud newidiadau cadarnhaol i'w ffordd o fyw".

Dywedodd Dr Julie Bishop o Iechyd Cyhoeddus Cymru: "Ry'n ni'n gwybod fod pobl eisiau gwneud dewisiadau iachach, ac fe fyddai hyn yn un cam i'r cyfeiriad hwnnw, ond mae mwy o waith i'w wneud eto."

Mae Consortiwm Manwerthu Cymru wedi rhybuddio yn y gorffennol y gallai cynlluniau o'r fath leihau'r dewis a chynyddu'r prisiau.