Saith yn pledio'n ddieuog yn achos saethu Rhondda Cynon Taf

Bu farw Joanne Penney ar ôl cael ei saethu yn ei brest yn Nhonysgubioriau fis Mawrth

Mae saith o bobl wedi pledio'n ddi-euog i gyhuddiadau'n ymwneud â marwolaeth dynes a gafodd ei saethu yn Rhondda Cynon Taf.

Bu farw Joanne Penney o'i hanafiadau ar ôl cael ei darganfod mewn fflat yn Llys Illtud yn ardal Green Park yn Nhonysguboriau ar 9 Mawrth.

Roedd cwest ym mis Mawrth wedi clywed bod y ddynes 40 oed wedi marw ar ôl cael ei saethu yn ei brest, gydag anafiadau i'w chalon a'i hysgyfaint.

Mae wyth o bobl i gyd wedi cael eu cyhuddo mewn cysylltiad â'r achos, ac roedd saith yn cyflwyno eu ple yn Llys y Goron Caerdydd ddydd Llun.

Fe ddigwyddodd y saethu mewn cyfeiriad yn Llys Illtyd, meddai'r heddlu

Mae Jordan Mills-Smith, 33 o Bentwyn yng Nghaerdydd, Marcus Huntley, 20 o Laneirwg, Caerdydd, Joshua Gordon, 27 o Oadby yn Sir Gaerlŷr, Tony Porter, 68, o Braunstone Town, Sir Gaerlŷr a Kristina Ginova, 21 o Oadby, i gyd yn gwadu cyhuddiad o lofruddiaeth ac o gymryd rhan mewn gweithgareddau gang troseddol.

Mae Melissa Quailey-Dashper, 39, o Gaerlŷr yn wynebu'r un cyhuddiadau ond doedd hi ddim yn bresennol yn y gwrandawiad.

Mae Sai Raj Manne, 25 ac sydd heb gyfeiriad sefydlog, a wedi gwadu bod â gwn yn ei feddiant a chymryd rhan mewn gweithgareddau gang troseddol.

Mae Molly Cooper, 33 o Gaerlŷr, wedi gwadu cael gafael ar fwledi heb drwydded a chymryd rhan mewn gweithgareddau gang troseddol.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.