Ergyd gwn i'w brest laddodd menyw yn Nhonysguboriau - cwest

Mae teulu Joanne Penney wedi'i disgrifio fel rhywun a oedd "yn cael ei charu'n fawr gan bawb oedd yn ei hadnabod"

Ergyd gwn i'w brest a laddodd menyw yn Nhonysguboriau yn gynharach yn y mis, clywodd cwest.

Clywodd y gwrandawiad ym Mhontypridd fod yr heddlu wedi dod o hyd i Joanne Penney, 40, yn gorwedd ar ei chefn ac yn ddiymateb ar lawr ystafell fyw fflat yn ardal Green Park ar 9 Mawrth am 18:10.

Clywodd y cwest nad oedd modd ei hachub a chyhoeddwyd ei bod wedi marw yn y fan a'r lle.

Daeth archwiliad post mortem i'r canlyniad mai achos ei marwolaeth oedd "clwyf ergyd gwn i'r frest chwith, yn ymwneud â'r galon a'r ysgyfaint chwith" a'u bod yn disgwyl adroddiad tocsicoleg a microsgopeg.

Roedd yr heddlu wedi dod o hyd i Joanne Penney, 40, yn gorwedd ar ei chefn ac yn ddiymateb ar lawr ystafell fyw ei fflat yn ardal Green Park ddydd Sul, Mawrth 9fed.

Clywodd y llys fod Ms Penney wedi ei geni yn Aberdâr ond nad oedd ganddi gartref sefydlog.

Dywedodd yr Uwch Grwner, Graeme Hughes, fod marwolaeth Ms Penney yn amlwg wedi cynnwys "trais" a gohiriodd y cwest oherwydd bod ymchwiliad yr heddlu i'w marwolaeth yn parhau.

Mae chwech o bobl wedi'u cyhuddo mewn cysylltiad â llofruddiaeth y ddynes 40 oed – pump o lofruddiaeth ac un o'u cynorthwyo - ac mae disgwyl iddyn nhw sefyll eu prawf ym mis Hydref.

Wrth siarad ar ôl ei marwolaeth, dywedodd teulu Ms Penney eu bod wedi'u distrywio gan eu marwolaeth gan ei disgrifio fel rhywun a oedd "yn cael ei charu'n fawr gan bawb oedd yn ei hadnabod".