Rhan o'r A470 i ailagor wythnos yma ar ôl tri mis o waith

Mae'r gwaith o atgyweirio a llenwi'r twll yn y ffordd wedi'i orffen ar yr A470 ger Talerddig

Bydd rhan o'r A470 yn y canolbarth sydd wedi bod ar gau am 12 wythnos yn ailagor ddiwedd yr wythnos, yn dilyn gwaith ffordd sylweddol.

Mae Llywodraeth Cymru wedi cadarnhau y bydd yr A470 rhwng Talerddig a Dolfach yn ailagor, yn ôl y cynllun, ar 11 Ebrill.

Ym mis Ionawr, dechreuodd y gwaith ar atgyweirio twll yn Nhalerddig gyda disgwyl iddo gymryd hyd at 12 wythnos.

Yn ôl Llywodraeth Cymru, roedd y gwaith yn cynnwys atgyweiriadau cymhleth a helaeth i'r wal gynhaliol uwchben Afon Iaen gyfagos ac roedd angen cau'r ffordd yn llawn rhwng 20 Ionawr ac 11 Ebrill.

Mae gweithwyr wedi gorfod creu strwythur newydd o dan y ffordd, ger yr afon, a'i lenwi dros gyfnodau.

Bydd goleuadau traffig dwyffordd nawr yn cael eu hailosod ar y safle tra bod rhwystr diogelwch yn cael ei osod.

Bydd yr holl fesurau rheoli traffig wedi'u symud o'r safle erbyn 30 Ebrill, neu cyn hynny os oes modd, yn ôl y llywodraeth.

Mae rhai gyrwyr wedi bod yn anwybyddu arwyddion sydd wedi'u codi i geisio atal problemau

Mae'r rhan hon o'r brif ffordd rhwng y gogledd a'r de wedi bod ynghau ers diwedd Ionawr, ac fe gafodd cyfnod y gwaith ei ymestyn er mwyn galluogi gwyriad mawr o'r system ddŵr.

Mae dargyfeiriad o 70 milltir wedi bod yn achosi problemau dirfawr i bobl leol sy'n byw mewn pentrefi cyfagos.

Mae trigolion lleol yn dweud eu bod wedi gweld cynnydd mewn cerbydau a loriau yn defnyddio ffordd gefn fechan rhwng Talerddig a Phont Dolgadfan er mwyn ceisio osgoi'r dargyfeiriad swyddogol.

Yn wreiddiol roedd y gwaith atgyweirio rhwng Talerddig a Dolfach fod i ddigwydd ym mis Hydref, ond cafodd ei ohirio wedi'r gwrthdrawiad rhwng dau drên yn y canolbarth.

Ym mis Tachwedd 2023 fe gwympodd rhan o wal o dan yr A470 ger Talerddig i mewn i afon, gan adael twll ar ochr y ffordd.

Cafodd y ffordd ei chau am tua wythnos bryd hynny, wrth i fesurau dros dro gael eu rhoi mewn lle cyn caniatáu i un lôn agor gyda goleuadau traffig.

Ym mis Tachwedd 2023 fe gwympodd rhan o wal o dan yr A470 ger Talerddig i mewn i afon, gan adael twll ar ochr y ffordd.

Dywedodd yr Ysgrifennydd Trafnidiaeth, Ken Skates, ei fod yn "deall y problemau mae'r gwaith hwn wedi'u hachosi" ac fe hoffai "ddiolch i fodurwyr a thrigolion lleol am eu hamynedd wrth i'r gwaith gael ei wneud".

"Fodd bynnag, roedd yn hanfodol bod y gwaith hwn yn cael ei wneud ar yr adeg hon er mwyn sicrhau y gall y ffordd barhau i fod ar agor yn y blynyddoedd i ddod.

"Hoffwn i hefyd ddiolch i Asiant Cefnffyrdd Gogledd a Chanolbarth Cymru a'u cadwyn gyflenwi am eu gwaith caled i sicrhau bod y gwaith yn cael ei gwblhau yn ôl yr amserlen ac yn lleihau lefel y tarfu cymaint â phosibl."