Cyflwyno rhaglen frechu ar gyfer haint anadlol yng Nghymru

Bydd y brechlyn yn cael ei gynnig i ferched beichiog o fis Medi

Bydd rhaglen frechu newydd i ddiogelu babanod a phobl hŷn rhag haint anadlol cyffredin yn cael ei chyflwyno yng Nghymru ym mis Medi.

Gallai'r brechlyn arbed 1,000 o fabanod bob blwyddyn rhag gorfod cael triniaeth ysbyty am Feirws Syncytiol Anadlol (RSV), medd Llywodraeth Cymru.

Mae RSV yn feirws heintus sy'n effeithio naw o bob 10 o blant cyn eu pen-blwydd yn ddwy oed.

Fe all hefyd arwain at gymhlethdodau iechyd difrifol i oedolion dros 75 oed, gan arwain at tua 125 o farwolaethau bob blwyddyn yng Nghymru.

O fis Medi bydd brechiad rhag RSV yn cael ei gynnig i ferched beichiog a phobl 75-79 oed.

I'r rhan fwyaf o bobl mae RSV yn achosi salwch anadlol ysgafn gyda symptomau tebyg i annwyd.

Ond i fabanod dan flwydd oed a'r henoed, mae risg sylweddol o haint difrifol a allai arwain at orfod mynd i'r ysbyty.

Dywed y Gweinidog Iechyd Eluned Morgan: "Mae tystiolaeth yn dangos bod y brechlyn yn ddiogel ac yn effeithiol a bydd brechu ein darpar famau yn helpu i atal ein babanod ieuengaf rhag mynd yn ddifrifol wael gyda’r feirws o’u genedigaeth.

"Bydd y brechlyn hwn hefyd yn ein helpu ni i gadw oedolion hŷn yn ddiogel dros fisoedd y gaeaf a byddwn yn annog pawb sy’n gymwys i’w gael.”

Ychwanegodd pennaeth brechu yn Iechyd Cyhoeddus Cymru, Dr Christopher Johnson: "Mae’n rhaglen frechu newydd sy’n newid pethau a bydd yn amddiffyn miloedd o’n pobl mwyaf agored i niwed ni rhag mynd yn sâl yn y lle cyntaf, neu’n lleihau’n sylweddol y tebygolrwydd o haint difrifol, gan gadw pobl allan o’r ysbyty a rhag bod angen gweld meddyg teulu, a galluogi mwy o bobl i gael budd o wasanaethau’r GIG.”