Y teulu o Faesteg a'u cwmni deifio yn Yr Aifft

Pan roedd yn ifanc, roedd Alun Evans yn breuddwydio am gael deifio o dan y môr fel Jacques Cousteau, ei arwr o'i hoff raglen deledu.

Dros hanner canrif yn ddiweddarach, mae'n byw'r freuddwyd, ac yn rhedeg cwmni deifio llwyddiannus gyda'i deulu draw yn Sharm El-Sheikh yn Yr Aifft.

"Oedden ni'n deifio yng Nghymru am flynyddoedd cyn dod yma," eglurodd wrth BBC Cymru Fyw.

"Roedd deifio wedi dechrau dod yn fwy poblogaidd, a dechreuodd clybiau bach o amgylch y wlad. 'Nes i ddysgu gyda chlwb Port Talbot gynta', ac wedyn o'n i gyda Chlwb Deifio Ogwr am tua 20 mlynedd.

"O'dden ni'n deifio yn Sir Benfro, yr Alban, Ynysoedd y Sianel, ac wrth gwrs ddaethon ni yma i Sharm."

Mae 'na lawer o greaduriaid i'w gweld oddi ar yr arfordir yng nghyffiniau Sharm El-Sheikh

Mae Sharm El-Sheikh yn un o lefydd gorau'r byd ar gyfer deifio, ac roedd Alun a'i wraig Moyra wrth eu boddau yn gweld yr holl olygfeydd a chreaduriaid o dan y tonnau.

Blwyddyn mas

Felly pan gollodd Alun ei swydd fel cynghorydd ariannol yn ardal Maesteg, penderfynodd ddefnyddio'r tâl diswyddo i fynd yn syth yn ôl i'r Aifft i wneud cymhwyster i fod yn hyfforddwr deifio.

"Pan o'n i'n gwneud y cwrs, 'nath y perchennog yna ofyn i mi weithio yna full-time. O'n i eisiau bach o saib o weithio adre, a falle mynd 'nôl mewn blwyddyn. O'n i'n ei alw yn gap year, ond o'n i'n 46 pryd 'ny, felly roedd pawb yn dweud mai sabbatical oedd e!

Mae Alun wrth ei fodd pan mae'n deifio

"O'dden ni'n cael o sbort, ac o'n i'n meddwl fydd rhaid i fi fynd yn ôl i weithio yn y swydd o'n i'n ei 'nabod. Ond beth wnaeth i ni aros yma oedd 'naethon ni golli sawl ffrind yn ifanc, a feddylion ni 'ni'n byw fan hyn, ry'n ni'n hapus ofnadwy... a mae bywyd yn rhy fyr'.

Felly aeth Alun a Moyra ati i sefydlu eu cwmni deifio eu hunain.

Alun (canol) gyda'i feibion, Huw a Gwyn. Mae'r ddau fab wedi gweithio i'r cwmni dros y blynyddoedd, a Gwyn yw rheolwr y ganolfan, bellach

Ugain mlynedd yn ddiweddarach, mae'r cwmni'n mynd o nerth i nerth; mae ganddyn nhw 18 o staff llawn amser, a phob un yr un mor angerddol am ddeifio â'r perchnogion.

"Roedd rhai o'r cwmnïoedd deifio eraill mor fawr, roedden nhw fel ffatri braidd. Felly 'nes i ddechrau ar ben fy hun, i roi personal service i bobl. Mae'r cwsmeriaid yn cwrdd â Moyra a fi bob dydd, ar ôl y cwch cyn mynd yn ôl i'r gwesty, fy mab hynaf, Gwyn, yw rheolwr y ganolfan a mae pawb sy'n gweithio 'da ni yn glos iawn.

"Dyna'r awyrgylch ni wedi ei greu, fel o'n ni yn y clwb deifio 'nôl adre. Roedd teimlad grêt yno; pawb yn dod 'mlaen a chwrdd i ddeifio a chymdeithasu a chael sbort. Dyna fodel y cwmni yma. Ac mae pobl yn dod 'nôl dro ar ôl tro i ddeifio gyda ni."

Moyra ac Alun yn dathlu ennill gwobrau'r ganolfan ddeifio orau a'r hyfforddwr gorau mewn seremoni wobrwyo yn 2019

Mae'r cwsmeriaid yn amlwg yn hapus; mae Elite Diving wedi cael ei enwi yn gwmni deifio gorau'r byd deirgwaith, a'r cwmni deifio gorau yn y Môr Coch hyd yn oed mwy o weithiau, sydd yn gwneud iddyn nhw deimlo'n falch ofnadwy, meddai Alun.

Ddim angen bod ofn siarcod!

Daw pobl o bell ac agos i ddeifio lleoliadau trawiadol ger Sharm El-Sheikh, a phawb eisiau cael gweld creaduriaid y môr yn agos; y cwrel, y pysgod a'r morgathod neidiol (manta rays).

A does dim rhaid poeni am fod yn rhy agos at siarcod, eglurodd Alun:

"Mae'r deifwyr am weld siarcod, ond dydyn ni ddim yn gweld gymaint â liciwn ni! Dydyn nhw ddim yn hoffi'r swigod mae deifwyr yn eu creu, felly maen nhw'n aros i ffwrdd. Falle'n edrych ychydig bach ond wedyn yn mynd.

"Dim pobl yw eu bwyd nhw. Dwi wedi bod yn y môr gyda phedwar tiger shark o amgylch fi. Doedden nhw ddim eisiau ni o gwbl; y cwbl oedden nhw eisiau oedd pysgod eraill, neu bethau marw.

"Nawr yw'r tymor gorau i ddeifio i weld heigiau mawr o siarcod hammerhead.

"Ni wedi bod yn gweld rhai unigol yn dod 'nôl a 'mlaen. Ond mae 'na le yn yr haf lle maen nhw'n dod gyda'i gilydd pan mae'r dŵr wedi twymo, ac mae criw mawr yn mynd o'n cwmpas ni."

Nôl i Gymru?

Mae'r pâr yn dychwelyd i Gymru bob hyn a hyn, i ymweld â theulu, ac wedi prynu tŷ yn Sir Benfro, yn yr ardal roedden nhw mor hoff o ddeifio ynddi, yr holl flynyddoedd hynny yn ôl.

Mae'r tywydd yn Sharm El-Sheikh yn llawer brafiach nag yn ôl yng Nghymru fach, wrth gwrs, gyda'r tymheredd yn cyrraedd tua 20C yn y gaeaf ac yn codi i 45C yn yr haf.

Felly ar ôl 23 o flynyddoedd, ydi'r cwpwl o Faesteg wedi cyfarwyddo â gwres tanbaid yr Aifft?

"Oherwydd ni'n byw yma, mae'r corff yn dod i arfer ychydig. Ac ry'n ni'n treulio'r dydd tu fewn yn y swyddfa gydag air-con. Ar y bws i fynd i'r cwch, mae air-con. Mae 'na awel y môr ar y cwch, a chysgod..."

Felly efallai bod Cymry byth yn dod i arfer â gwres mawr wedi'r cwbl?!

Diolch byth am awel y môr ar y cwch, yng nghanol gwres llethol Sharm El-Sheikh

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.