Gweithiwr iechyd yn cyfaddef troseddau rhyw yn erbyn plant

Tracy Turner yn cael ei thywys i'r llys ddydd Mawrth

Mae dau o bobl o Gaerdydd - un ohonynt yn weithiwr iechyd - wedi pledio'n euog i nifer o droseddau rhyw yn erbyn plant.

Mae Tracy Turner, 51 oed o ardal y Rhath - sy'n gynorthwyydd theatr yn Ysbyty Athrofaol Cymru yn y brifddinas - wedi cyfaddef i chwe chyhuddiad o drefnu i gyflawni troseddau rhyw yn erbyn plant, a dau gyhuddiad o wneud delweddau anweddus o blentyn.

Plediodd Stuart Compton, 45 oed o ardal Cathays, hefyd yn euog i chwe chyhuddiad o drefnu i gyflawni troseddau rhyw yn erbyn plant.

Yn wreiddiol cafodd y ddau eu cyhuddo o gynllwynio i lofruddio, ond dywedodd yr erlyniad wrth y llys bod y cyhuddiadau hynny wedi cael eu gollwng erbyn hyn.

Plediodd Stuart Compton yn euog i chwe chyhuddiad o drefnu i gyflawni troseddau rhyw yn erbyn plant

Plediodd y diffynyddion yn ddieuog i nifer o gyhuddiadau eraill, gan gynnwys cynllwynio i dreisio merch, cynllwynio i ymosod yn rhywiol, a herwgipio.

Bydd y cyhuddiadau hynny nawr ar ffeil.

Cafodd y ddau ddiffynnydd eu cadw yn y ddalfa, a byddan nhw'n cael eu dedfrydu ar 28 Gorffennaf.

Fe gawson nhw rybudd gan y Barnwr Tracey Lloyd-Clarke fod dedfryd o garchar yn anochel.

Dywedodd Bwrdd Iechyd Caerdydd a'r Fro bod Turner wedi cael ei diswyddo ar 12 Mawrth eleni, a'u bod wedi cydweithio â'r heddlu trwy gydol eu hymchwiliad.