Cymru yn curo Japan - ac yn ennill eu gêm gyntaf ers 2023

Josh AdamsGetty Images

Ennill fu hanes tîm rygbi Cymru o 22 i 31 fore Sadwrn yn erbyn Japan gan ddod â'u rhediad o golli 18 gêm o'r bron i ben.

Cafwyd hanner cyntaf llawn cyffro er gwaetha'r gwres tanbaid.

Cymru sgoriodd gyntaf gyda Josh Adams yn tirio'r bêl wedi deng munud o chwarae.

Collodd yr un chwaraewr gyfle iddyblu'r fantais rai munudau'n ddiweddarach wedi iddo daro'r bêl ymlaen.

Sgoriodd y mewnwr Kieran Hardy ddau gais pellach i'r Cymry cyn hanner amser ond tarodd Siapan yn ôl eiliadau cyn yr egwyl â chais gan Takeuchi.

10-21 i Gymru oedd y sgôr ar ddiwedd yr hanner cyntaf.

Johny WilliamsGetty Images

Tarodd y tîm cartref yn ôl yn gryf ddechrau'r ail hanner gyda cheisiau gan Dearns a Riley o fewn tair munud i'w gilydd.

Gyda hyder yn brin yn eu chwarae, gwelwyd y Cymry'n gwneud camgymeriadau di-ri wrth i'r gêm fynd rhagddi.

Gyda phum munud o'r gêm yn weddill, sgoriodd maswr Cymru, Dan Edwards, gais yn dilyn pas gampus gan yr eilydd, Plumtree.

Wedi 644 diwrnod o ddisgwyl am fuddugoliaeth, gall tîm Cymru a'u cefnogwyr ddathlu o'r diwedd.

Tîm Cymru

Cymru: Blair Murray; Tom Rogers, Johnny Williams, Ben Thomas, Josh Adams; Dan Edwards, Kieran Hardy; Nicky Smith, Dewi Lake (capten), Archie Griffin, Freddie Thomas, Teddy Williams, Alex Mann, Josh Macleod, Aaron Wainwright.

Eilyddion: Liam Belcher, Gareth Thomas, Chris Coleman, James Ratti, Taine Plumtree, Tommy Reffell, Reuben Morgan-Williams, Keelan Giles.

Tîm Japan

Japan: Ichigo Nakakusu; Kippei Ishida, Dylan Riley, Shogo Nakano, Halatoa Vailea; Seungsin Lee, Naito Sato; Yota Kamimori, Mamoru Harada, Keijiro Tamefusa, Epineri Uluiviti, Warner Deans, Michael Leitch (capten), Jack Cornelsen, Faulua Makisi.

Eilyddion: Hayate Era, Sena Kimura, Shuhei Takeuchi, Waisake Raratubua, Ben Gunter, Shinobu Fujiwara, Sam Greene, Kazema Ueda.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i cymrufyw@bbc.co.uk neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.

Pynciau cysylltiedig