Crasfa i Gymru gan Wlad Pwyl mewn gêm gyfeillgar

Mae Gwlad Pwyl chwe safle'n uwch na Chymru ar restr detholion y byd

Mae Cymru wedi colli'n drwm mewn gêm gyfeillgar yn erbyn Gwlad Pwyl - gêm gyntaf y garfan ers ymddeoliad Jess Fishlock o bêl-droed rhyngwladol.

Golyga'r golled - o bum gôl i ddwy yn stadiwm Rodney Parade, Casnewydd - bod Cymru heb ennill 11 o gemau'n olynol bellach.

Fe ddechreuodd Cymru'n dda, ac wedi pum munud o chwarae roedd Elise Hughes wedi sgorio gôl gyntaf y noson.

Ond yr ymwelwyr oedd ar y blaen erbyn yr egwyl, wedi i Nadia Krezyman (22) a Milena Kokosz (30) fanteisio ar wendidau Cymru wrth amddiffyn ymosodiadau o chwarae gosod.

Roedd pethau'n edrych yn gymharol addawol ar ddechrau'r ail hanner hefyd, wrth i'r ddau eilydd Sophie Ingle a Ceri Holland amlygu eu profiad.

Ond agor wnaeth y bwlch rhwng y ddau dîm o ganlyniad tair gôl o fewn tri munud - fe rwydodd Krezyman (54) am yr eildro ac er i Carrie Jones (55) daro'n ôl yn syth, fe sgoriodd Paulina Tomasiak (56) ac roedd sgôr o 1-2 ar yr egwyl bellach yn 2-4.

Roedd gôl olaf Gwlad Pwyl, gan Klaudia Jedlinska (84) yn un gampus.

Er na bylodd ymdrechion Cymru i gau'r bwlch fe fydd y ffaith i'r tîm golli saith gêm o'r bron - ac ildio 30 o goliau mewn 11 gêm - yn siŵr o fod yn destun pryder.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.