Colled i Gymru yng ngêm olaf Jess Fishlock

Mae Jess Fishlock wedi chwarae 166 o weithiau i dîm merched Cymru

Colli a wnaeth Cymru yn y gêm gyfeillgar yn erbyn Awstralia ar brynhawn Sadwrn.

Fe gyhoeddodd Fishlock yn gynharach yn y mis ei bod yn bwriadu ymddeol o bêl-droed rhyngwladol wedi'r gêm yn erbyn Y Matildas yn Stadiwm Dinas Caerdydd.

Dyma oedd cap rhif 166 i Fishlock, sydd hefyd wedi sgorio 48 o goliau i Gymru - mwy nag unrhyw chwaraewr arall yn hanes y gêm yng Nghymru.

Sgoriodd Courtney Nevin i'r Matildas o gic rydd ar ôl 28 munud, gan adael sgôr o 0-1 ar yr hanner.

Brwydrodd Cymru yn ôl yn yr ail hanner wrth i'r ferch o Drawsfynydd, Mared Griffiths, sgorio i'w gwneud hi'n gyfartal wedi 56 munud.

Ond, daeth Awstralia eto i gosbi Cymru yn agos at y terfyn - trwy gôl Caitlin Foord, gan ddod i'r brig gyda sgôr o 1-2.

Mared Griffiths wnaeth sgorio unig gôl Cymru o'r diwrnod

Ar ôl y chwiban olaf, diolchodd Fishlock i'r "holl gefnogwyr am ymddangos bob amser yn fy ngyrfa".

"Mae wedi bod yn anrhydedd oes i chwarae o'ch blaenau chi. Plîs cefnogwch y grŵp yn mynd ymlaen.

"Dwi wrth fy modd hefo bod yn Gymraes," meddai Jess Fishlock.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.