Newid costau parcio Caerdydd am 'chwalu busnesau lleol'

Mae Cyngor Caerdydd yn ceisio annog pobl i fod yn "llai dibynnol ar eu ceir"

Mae cynigion Cyngor Caerdydd i newid trefniadau parcio y tu allan i ganol y ddinas yn "annheg" ac am "chwalu busnesau", yn ôl pobl leol.

Mae Alwen Marshall, perchennog siop yn yr Eglwys Newydd, yn poeni y bydd pobl yn gyrru trwy'r Eglwys Newydd ac yn dewis siopa mewn archfarchnadoedd yn sgil y newidiadau.

Ar hyn o bryd, mae modd parcio am ddim am hyd at ddwy awr, ond fe allai hynny newid yn dilyn ymgynghoriad.

Dywedodd llefarydd ar ran Cyngor Caerdydd eu bod nhw'n annog pobl i fod yn "llai dibynnol ar eu ceir" trwy "fuddsoddi'n sylweddol mewn llwybrau beicio a cherdded".

Mae'r cynigion yn cynnwys newid amseroedd gweithredu rhai meysydd parcio

Mae'r cynigion yn cynnwys:

• newid amseroedd gweithredu rhai meysydd parcio;

• diweddaru costau parcio a chael gwared ar y cyfnod parcio am ddim;

• newid sut mae cynlluniau talu ac aros yn gweithio;

• cyflwyno rheolau newydd ar gyfer trwyddedau busnes;

• cynnig mwy o fathau o docynnau tymor.

"Yn amlwg mae'n mynd i effeithio ar ein busnesau ni," meddai Alwen Marshall

Yn berchennog ar siop Iechyd Da yn yr Eglwys Newydd yng ngogledd y ddinas, mae Alwen Marshall yn poeni y bydd llai o bobl yn ymweld â'r ardal petai newid yn y tâl parcio.

Wrth siarad ar raglen Dros Frecwast dywedodd ei bod yn ofni fod busnesau lleol yn "mynd i gael eu chwalu".

"Yn amlwg mae'n mynd i effeithio ar ein busnesau ni," meddai.

"Ma' nhw mynd i gael eu chwalu a fydd pawb yn dreifo trwy'r pentre' ac yn mynd i'r archfarchnadoedd, felly 'da ni'n poeni'n arw.

"Y gwirionedd ydy, mae'n ganran uchel o gost pan 'da chi'n cymharu efo rhywun yn dod i'r pentre' ac yn prynu cerdyn pen-blwydd - chi'n prynu cerdyn pen-blwydd ac mae 50c ar ben hwnna yn swm sylweddol."

Mae Alwen Marshall yn rhedeg siop Iechyd Da yn yr Eglwys Newydd yng ngogledd Caerdydd

Yn ôl y cyngor, y bwriad yw helpu'r amgylchedd, ond mae Ms Marshall o'r farn bod "ffyrdd gwahanol i edrych ar ôl yr amgylchedd".

"Ma' pobl yn cael eu hannog ond dydi pawb ddim yn gallu [cerdded yma]," meddai.

"'Da ni jest yn teimlo fel does dim llais i ni fel busnesau."

'Byrdwn ychwanegol'

I Eurof James, cadeirydd Clwb Rygbi Cymry Caerdydd, mae'r cynigion yn "annheg" i aelodau a theuluoedd y clwb.

Dywedodd bod y clwb yn ddibynnol ar y cyngor, a bod perthynas agos gyda'r bobl sy'n paratoi caeau ym Mhontcanna.

Esboniodd bod y clwb eisoes yn talu i ddefnyddio'r caeau ac y byddai tâl i ddefnyddio'r maes parcio yn "newid enfawr".

"Ar hyn o bryd ar brynhawn Sadwrn ma' tîm y dynion yn chwarae ma'r tâl am ddim," meddai.

"Bydd rhaid i'r dynion yna dalu am bedair awr trwy gydol y gêm a chael cawod, ac i dalu £4.50 - sydd yn dipyn o naid.

"Ond yn fwy byth i'n teuluoedd ni gyd - ein holl blant ar fore dydd Sul."

Dywed Eurof James y gallai'r newidiadau greu "byrdwn ychwanegol" i'r clwb

Ychwanegodd: "'Da ni'n gwybod bod Cymru am fod ar y blaen o ran chwaraeon – ma' 'na fynediad i fod i gaeau gwyrdd a chyfleusterau hamddena.

"'Da ni'n gweld hwn fel treth ar chwaraeon - i dimau criced, pêl-droed Cymric.

"'Da ni isio plant yn rhan o chwaraeon ac i'r gêm ddatblygu yn ein prifddinas, ond ma' hyn yn rhwystr i chwaraeon Cymru."

Bydd yr ymgynghoriad ar y newidiadau yn dod i ben ddydd Sadwrn yma.

Dywedodd Eurof James y byddai gorfod talu i ddefnyddio maes parcio caeau Pontcanna yn "newid enfawr"

Dywedodd llefarydd ar ran Cyngor Caerdydd: "Mae'r sefyllfa o ran cyllideb y cyngor dros y ddwy flynedd ddiwethaf wedi bod yn heriol.

"Mae penderfyniadau anodd wedi gorfod cael eu gwneud, gan gynnwys cael gwared ar y mannau parcio am ddim am awr neu ddwy mewn ardaloedd siopa preswyl.

"Bydd y newid hwn yn dod i rym yn ddiweddarach eleni yn dilyn y broses gyfreithiol a bydd unrhyw incwm dros ben yn cael ei ailfuddsoddi mewn cynlluniau priffyrdd a thrafnidiaeth."

Ychwanegodd bod y cyngor yn annog pobl i fod yn "llai dibynnol ar eu ceir" trwy "fuddsoddi'n sylweddol mewn llwybrau beicio a cherdded".

"Trwy fuddsoddi mewn trafnidiaeth gyhoeddus a theithio llesol, byddwn yn cynnig dewis arall realistig i deithio mewn car preifat, sydd yn ei dro'n cynnig manteision sylweddol, gan roi opsiynau gwell ac iachach i drigolion ac ymwelwyr deithio o amgylch y ddinas."