Pobl ifanc yn 'fwy parod i dalu am wasanaethau Cymraeg'

“Mae unrhyw fusnes sy’n creu gwasanaeth yn y Gymraeg yn creu rhywbeth unigryw ynddo’i hun,” meddai Catrin Hughes

Mae gwaith ymchwil yn awgrymu bod pobl ifanc yng Nghymru yn fwy tebygol o dalu mwy am wasanaethau neu gynnyrch os yw'n cael ei werthu drwy'r Gymraeg.

Yn ôl gwaith ymchwil gan Brifysgol Bangor fe allai'r Gymraeg gyfrannu lot i fusnesau yng Nghymru, ac mae hynny’n cael ei gefnogi gan gynllun Bwrlwm Arfor sydd wrthi'n cynnig grantiau i fusnesau am wella eu darpariaeth o'r iaith.

Yn ôl dynes o Wynedd a sefydlodd gwmni ddwy flynedd yn ôl, mae’r iaith wedi bod yn fodd o ddenu cwsmeriaid newydd yn ogystal â marchnata llwyddiannus.

Mae cynllun Bwrlwm Arfor yn gweithredu o fewn siroedd sy’n cael eu hystyried yn gadarnleoedd i’r iaith Gymraeg - Môn, Gwynedd, Ceredigion a Chaerfyrddin.

'Rhywbeth unigryw'

Mi sefydlodd Catrin Hughes gwmni Dwylo Bach ddwy flynedd yn ôl yn ardal Bangor, ac mae’n cynnal sesiynau i rieni a’u babanod.

“Mae unrhyw fusnes sy’n creu gwasanaeth yn y Gymraeg yn creu rhywbeth unigryw ynddo’i hun,” meddai.

“Waeth beth yw’ch busnes chi mae’n rhoi elfen lot fwy cryf i chi yn lleol a dwi’n teimlo bod modd i chi ddatblygu perthynas efo’r cleientiaid hefyd.

“Maen nhw’n teimlo’n gyfforddus a da chi’n creu rapport a bod nhw’n teimlo yn agos ata chdi.”

Mae Ms Hughes yn marchnata ei sesiynau ac yn eu cynnal yn gwbl ddwyieithog gan ddweud bod gwneud hynny wedi denu mwy o gwsmeriaid fyth i ddefnyddio'r sesiynau.

Mae’r cynllun ar hyn o bryd yn galw ar fusnesau o fewn cadarnleoedd y Gymraeg i wneud cais am bres o gronfa gwerth £300,000 i dderbyn cefnogaeth.

Mi all y gwasanaeth wedyn helpu gyda chyfieithu a chynnig ffyrdd o ddatblygu’r Gymraeg o fewn y busnes gyda’r nod o gynyddu ymwybyddiaeth a darpariaeth.

Zoe Pritchard o Fwrlwm Arfor

“Mae 'na gyfle fan hyn,” meddai Zoe Pritchard o Fwrlwm Arfor.

“Cyfle i ni ddathlu'r hyn sydd ganddo ni o ran busnesau sy’n gwneud defnydd gwych o’r Gymraeg a hefyd be' sy’n buddio yn economaidd a be' sy’n creu cyllid ac arian i ennill cwsmeriaid newydd oherwydd eu bod yn defnyddio’r iaith."

Mae gwaith ymchwil diweddar gan Brifysgol Bangor hefyd yn awgrymu bod pobl ifanc yn fwy tebygol o fynd yn ôl at fusnes mwy nag unwaith os oes darpariaeth drwy’r Gymraeg.

Yn ôl Dr Edward Thomas Jones sy’n economegydd ym Mhrifysgol Bangor mae’n bwysig gweld gwerth y Gymraeg ym myd busnes.

Cwsmeriaid ifanc sydd fwyaf parod talu am wasanaeth Cymraeg, meddai Dr Edward Thomas Jones

“Mi natho ni ymchwiliad yma ar draws gogledd Cymru yn edrych ar faint oedd cwsmeriaid yn fodlon talu i gael gwasanaeth drwy gyfrwng y Gymraeg.

“Natho ni ddarganfod fod pobl hŷn... doedda nhw ddim yn fodlon talu mwy am wasanaeth drwy gyfrwng y Gymraeg am wahanol resymau ond roedd cwsmeriaid ifanc yn fodlon talu mwy ar gyfer cael gwasanaethau drwy’r Gymraeg."

Mae hynny yn wir, meddai o’r busnesau lleiaf i’r mwyaf, a hynny wrth i archfarchnad ryngwladol Lidl dderbyn cydnabyddiaeth y llynedd am eu defnydd o’r Gymraeg.

Mae cynllun Bwrlwm Arfor rŵan yn galw am geisiadau er mwyn gwella darpariaeth busnesau o fewn cadarnleoedd y Gymraeg gan obeithio sicrhau dyfodol llewyrchus i’r iaith, meddai.