Dyn yn credu ei fod 'wedi ei dwyllo' cyn lladd cymar ei fab

Cafwyd hyd i gorff Sophie Evans yn ei chartref yn Llanelli ar 5 Gorffennaf 2024

Mae llys wedi clywed bod dyn o Sir Gâr sydd wedi ei gyhuddo o lofruddio cymar ei fab yn credu ei fod wedi cael ei dwyllo gan y cwpl.

Fe gafodd Sophie Evans ei darganfod yn farw yn ei chartref yn Llanelli ar 5 Gorffennaf 2024.

Mae Richard Jones, 50, o Borth Tywyn, wedi pledio'n euog i'w dynladdiad ond mae'n gwadu llofruddiaeth.

Mae'r rheithgor yn Llys y Goron Abertawe wedi clywed bod yr heddlu wedi canfod Ms Evans yn noeth ac â'i hwyneb i lawr yng nghegin ei chartref ar Ffordd Bigyn.

Roedd Ms Evans mewn perthynas â mab Mr Jones, Jamie Davies.

Clywodd y llys bod Mr Jones wedi cael ei holi gan yr heddlu naw gwaith dros ddau ddiwrnod mewn cysylltiad â'r digwyddiad.

"Dim sylw" oedd ei ateb i'r holl gwestiynau yn ystod y ddau gyfweliad cyntaf.

Yn ystod y trydydd cyfweliad, roedd ditectif wedi ei holi am y ffaith ei fod wedi chwilio'r we ynghylch dioddef twyll hunaniaeth.

Gofynnodd y Ditectif Gwnstabl Jonathan Gouldson wrtho a oedd yn credu ei fod wedi dioddef hynny yn bersonol, ac atebodd Mr Jones: "Do, rwy'n credu."

Mewn cyfweliad arall, gofynnodd DG Gouldson beth ddigwyddodd ar ddiwrnod marwolaeth Ms Evans.

Atebodd Mr Jones ei fod "wedi pendroni ynghylch y twyll 'ma", gan ychwanegu nad oedd "yn gallu cofio popeth - ro'n i'n eratig".

Mae'r achos wedi clywed bod Richard Jones yn ymweld yn aml â'r cartref roedd Sophie Evans yn ei rannu â'i fab, Jamie Davies

Roedd wedi dweud wrth yr heddlu ei bod yn cofio mynd i dŷ Ms Evans i gael golwg ar y draeniau.

Dywedodd ei fod wedi curo ar y drws, a bod Ms Evans wedi ei agor mewn tywel, ar ôl dod allan o'r gawod.

Clywodd y llys i Mr Jones ddweud ei fod wedi codi mater y "twyll" a'i fod "wedi colli ei ben" pan atebodd Ms Evans na wyddai dim amdano.

"Fe ddywedodd hi 'dim fy syniad i oedd e, syniad Jamie'," meddai Mr Jones wrth yr heddlu.

'Methu cofio beth ddigwyddodd'

Dywedodd ei fod wedi taro ei law ar gownter yn y gegin ar ôl "colli tymer", ac nad oedd yn cofio beth ddigwyddodd wedi hynny.

Ond roedd yn cofio bod mewn parc gwledig lleol oriau'n ddiweddarach - dywedodd ei fod yn dioddef "blackouts" achlysurol o ran ei gof.

Mewn ymateb i gwestiwn ai ef oedd wedi achosi'r anafiadau i Ms Evans atebodd: "Dwi ddim yn credu."

Wedi i'r heddlu awgrymu ei bod yn "amhosib" fod unrhyw un arall yn gyfrifol am yr ymosodiad arni, atebodd: "Mae'n ymddangos felly."

Mae Mr Jones yn gwadu cyhuddiad o lofruddiaeth ac mae'r achos yn parhau.