Arestio dyn ar amheuaeth o ddynladdiad bachgen, 16, fu farw

Roedd Llŷr Davies yn ddisgybl yn Ysgol Bro Teifi, Llandysul

Mae dyn yn ei 60au wedi cael ei arestio ar amheuaeth o ddynladdiad mewn cysylltiad â marwolaeth bachgen 16 oed mewn chwarel.

Bu farw Llŷr Davies yn dilyn "digwyddiad yn ymwneud â thryc" yn chwarel Gilfach ger Efailwen yn Sir Benfro ar 12 Mawrth eleni.

Ar y diwrnod, dywedodd Gwasanaeth Tân ac Achub Canolbarth a Gorllewin Cymru bod tryc wedi ei ganfod mewn afon fas, tra bod unigolyn wedi ei ddarganfod mewn lleoliad arall.

Fe wnaeth teulu Llŷr Davies, a oedd yn ddisgybl yn Ysgol Bro Teifi, Llandysul, ei ddisgrifio fel "bachgen caredig, doniol a hoffus".

Dywedodd Heddlu Dyfed-Powys ddydd Llun bod dyn yn ei 60au wedi cael ei arestio ar amheuaeth o ddynladdiad o ganlyniad i esgeulustod difrifol.

Mae wedi cael ei ryddhau dan ymchwiliad yr heddlu.

Mae achos llys yn digwydd ar hyn o bryd, ble mae athro yn gwadu ymosod ar Llŷr Davies dridiau cyn ei farwolaeth.

Clywodd y llys nad yw'r achos hwnnw yn gysylltiedig â'i farwolaeth mewn unrhyw ffordd.

• Roedd fersiwn flaenorol o'r erthygl hon yn nodi yn anghywir fod y dyn yn ei 60au wedi'i ryddhau ar fechnïaeth tra’n aros am ymholiadau pellach gan yr heddlu, ar sail gwybodaeth gan Heddlu Dyfed-Powys. Ers hynny mae'r heddlu wedi cywiro'r wybodaeth i ddweud ei fod wedi cael ei ryddhau dan ymchwiliad