2,000 wiced, 10,000 pelawd ac un pen-glin newydd

Pelawdau dros y degawdau... rhai o'r dros 60,000 o beli mae Dafydd Timothy wedi eu bowlio mewn hanner canrif gyda'r un clwb

Bowlio dros 60,000 pêl mewn 10,000 pelawd, bachu 2,000 o wicedi a chael un pen-glin newydd - i gyd mewn 50 mlynedd o ymroddiad i un clwb.

Dyna gamp Dafydd Timothy o'r Rhyl, wnaeth ymuno gyda chlwb criced Carmel nôl yn 1975.

Mae o'n parhau i chwarae hyd heddiw, a 936 gêm yn ddiweddarach mae wedi cyrraedd carreg filltir go arbennig.

Fe ddechreuodd ei ddiddordeb mewn criced pan roedd yn ddisgybl yn Ysgol Dewi Sant, Y Rhyl, ac Ysgol Glan Clwyd.

Mae'n cofio gweld poster ar ddiwedd yr 1960au yn hysbysebu cystadleuaeth yng nghlwb newydd Carmel and District, ger Treffynnon, ac aeth yno i roi cynnig arni.

Flynyddoedd yn ddiweddarach, pan roedd tua 20 oed, fe gafodd gynnig lifft gan rywun o'r Rhyl oedd yn chwarae i glwb Carmel - a phenderfynu ymuno.

Mae'n cadw cofnod manwl o'r gemau, ac felly ar ddechrau ei 50fed tymor gyda'r clwb eleni, roedd yn gwybod ei fod yn nesáu at wiced rhif 2,000.

Ymroddiad - gêm wedi ei drefnu gan chwaraewyr Carmel yn dilyn eira trwm ar eu cae Pen y Gelli dros gyfnod y Nadolig tua 15 mlynedd yn ôl

"Ddaethon nhw i gyd ar frys dweud y gwir," meddai Mr Timothy ar raglen BBC Radio Cymru Dros Frecwast.

"Ro'n i'n wyth yn brin dechrau'r tymor ac roedd 'na dair i bedair gêm wedi mynd heb fawr o lwyddiant.

"Nes i fachu un neu ddau ond wedyn ddaeth pedwar yn erbyn Rhuthun dydd Sadwrn diwetha' i gyd fel bysus Crosville gynt - roeddach chi'n disgwyl am oes ac wedyn roedd rhes ohonyn nhw'n dod."

Mae'r cyfan wedi dod mewn 10,700 pelawd - sydd gyfystyr â bowlio dros 63,000 o beli, a'r cyfan wedi gadael ei farc.

'Gadael ei draul ar fy mhengliniau'

"Ges i ben-glin newydd dair blynedd yn ôl oherwydd yr holl fowlio - mae wedi gadael ei draul ar fy mhengliniau ar ôl dros 10,000 o belawdau," meddai.

"Lwcus iawn mi 'naeth y llawfeddyg joban anhygoel, ac yn rhyfedd iawn y tymor dilynol mi nes i ei gyfarfod o ym Mhontblyddyn lle'r oedd ei fab o'n chwarae.

"Roedd gwên fawr ar ei wyneb a finnau'n poeni 'I hope I'm doing the right thing playing cricket', 'Oh I'm so glad,' medda fo, 'i'ch gweld chi'n chwarae ac yn mwynhau'.

"Felly roedd o'n teimlo bod o wedi 'neud joban dda ar fy mhen-glin a ro'n i, gobeithio, yn dangos y parch yn ôl trwy barhau i gadw'n heini a chwarae."

Yn ddiweddar fe ddaeth Dafydd Timothy ar draws llun o'i daid R E 'Bob' Price (yng nghanol y rhes flaen, gyda gwallt tywyll a mwstash ac yn gafael yn ei goes), oedd yn chwarae i dîm criced y Rhyl. Mae'n debyg i'r llun gael ei dynnu yn yr 1920au

Tydi Mr Timothy ddim yn cofio ei wiced gyntaf un, mae 'na stori tu ôl i wiced rhif 2,000.

Bron i 40 mlynedd yn ôl, roedd yn maesu i dîm Carmel mewn gêm oddi cartref yn erbyn Dolgellau - gyda'i wraig yn gwylio'r gêm efo'u babi bach Mari mewn pram.

Fe darodd chwaraewr ifanc y bêl am chwech, wrth i bawb ei gwylio hi'n hedfan tuag at y pafiliwn.

"Wnaeth y bêl daro'r to a rowlio lawr ac roedd pawb yn dal eu gwynt," meddai wrth Cymru Fyw.

"Wnaeth o rowlio a disgyn a glanio reit wrth wyneb Mari yn y pram. Mi fyddai wedi gwneud niwed difrifol os fyddai wedi glanio arni, o bosib wedi ei lladd."

Tua chwe blynedd yn ôl roedd mab Dafydd - Gwion, sydd hefyd yn chwarae criced - yn gwneud ymarfer dysgu mewn ysgol yn Yr Wyddgrug.

Dechreuodd drafod y gamp gydag athro oedd yn chwarae criced ers blynyddoedd.

Wrth i'r sgwrs ddatblygu i drafod clwb Carmel, daeth i'r amlwg mai fo oedd wedi taro'r bêl wnaeth bron â niweidio Mari dri degawd ynghynt.

A phwy oedd wiced rhif 2,000 Dafydd? Yr un dyn.

Dafydd, ar y chwith yn y rhes gefn, gyda'r tîm yn 1989

"Nes i dynnu ei goes wrth iddo fo fynd allan - 'dwi wedi talu pwyth yn ôl ar ôl 38 o flynyddoedd'," meddai Mr Timothy.

"Ond roedd y digwyddiad yn Nolgellau wedi cael effaith hynod arno - wedi bod yn drawmatig iddo fo. Mae'n anhygoel mai fo oedd wiced 2,000."

Ychwanegodd ei fod yn ffodus am gael y cyfle a'r gefnogaeth gan y clwb ac i'w deulu am ei alluogi i gyrraedd y garreg filltir.

Meddai: "Dwi ddim wedi sbïo nôl a dwi wedi bod yn hynod, hynod o ddiolchgar i'r clwb bach yma - di-nod o Sir y Fflint - am roi cyfle i mi.

"Mae'n glwb bach cartrefol, teuluol, agos atoch, ac er bod ni'n hynod o gystadleuol, gobeithio ein bod ni'n chwarae brand o griced teg efo pharch at ein gwrthwynebwyr ni hefyd."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.