Dymchwel ffatri eiconig yn y de i godi 400 o dai

Cynhyrchu peiriannau golchi oedd pwrpas ffatri Hoover ar un adeg, ond daeth hynny i ben yn 2009

Bydd cyn-ffatri Hoover, oedd yn cyflogi 5,000 o bobl ym Merthyr Tudful ar ei hanterth, yn cael ei dymchwel er mwyn codi dros 400 o dai.

Cynhyrchu peiriannau golchi oedd pwrpas y ffatri ar un adeg, ond daeth hynny i ben yn 2009, ac mae wedi bod yn safle dosbarthu i gwmni Haier tan y llynedd.

Mae'r cwmni peirianneg sifil, grŵp Walters, wedi cytuno i brynu'r ffatri ar yr amod o gael caniatâd cynllunio - sydd i'w ddisgwyl gan fod y safle eisoes wedi'i glustnodi ar gyfer tai.

Eu bwriad ydy dechrau ar y gwaith dymchwel flwyddyn nesaf, gyda'r nod o werthu'r safle ymlaen i adeiladu mwy na 400 o gartrefi erbyn diwedd 2026.

Diolchodd cwmni Hoover "i chi, Merthyr, am fod yn rhan anhepgor a bythgofiadwy o'n taith".

Daeth perchnogion Americanaidd Hoover i Ferthyr Tudful fel un o'r buddsoddiadau tramor mawr yn economi Prydain yn fuan ar ôl diwedd yr Ail Ryfel Byd.

Roedden nhw'n cyflogi 350 o bobl i ddechrau ond tyfodd hynny i fwy na 5,000 yn ystod y 1960au a'r 1970au wrth i'r farchnad ar gyfer peiriannau domestig gynyddu.

Roedd y rhain yn cynnwys peiriannau golchi, a nhw oedd y cyflogwyr mwyaf ym Merthyr, ac wedi rhoi gwaith i genedlaethau o deuluoedd.

Roedd tristwch mawr yn lleol yn 2009 pan benderfynodd y perchnogion, Candy, symud y gwaith cynhyrchu i Dwrci.

Mynnodd Candy ar y pryd nad oedd dewis ganddynt oherwydd colledion.