Bancio yn arfer bod yn 'hawdd' i elusennau - ond nid erbyn hyn

Mae'r banciau yn diystyru anghenion penodol elusennau, yn ôl comisiwn sy'n eu cynrychioli.

Mae Sefydliad Cymunedol Cymru yn dweud fod elusennau yn ei chael hi'n anodd i "gyflawni eu dyletswyddau cyfreithiol" wrth i fanciau'r stryd fawr gau.

Maen nhw'n clywed yn aml iawn am drafferthion mae nifer o'r grwpiau - yn enwedig rhai bychain - yn eu cael i greu cyfrifon ac i redeg eu busnes ariannol.

Ond mae'r banciau'n dweud fod ymweliadau â changhennau yn gostwng a bod y mwyafrif yn dewis bancio ar-lein.

'Dim syndod fod grwpiau'n cau'

Dywedodd Richard Williams, prif weithredwr y sefydliad, fod mwyafrif y grwpiau elusennol sy'n gweithio gyda'r henoed yn delio mewn arian parod.

"Ar ddiwedd yr w'thnos ma' pot o bres i fancio ac yn aml ni yn clywed pobl yn sôn am orfod dal bws a theithio tua 10 neu 15 milltir i'r banc agosa i gashio y pres," meddai.

"Pan bo' chi yn cofio mai gwirfoddolwyr yw y rhan fwya' o'r bobl yma, [pobl] sy' wedi gweithio neu ymddeol, mae e'n beth anghyfleus a dyw e ddim syndod fod rhai o'r grwpiau yn cau lawr dros amser."

Richard Williams o Sefydliad Cymunedol Cymru, sy'n ariannu tua 500 o grwpiau elusennol bob blwyddyn

Un elusen sy'n wynebu heriau oherwydd cau banciau yw Merched y Wawr.

Dywedodd Tegwen Morris, cyfarwyddwr cenedlaethol y mudiad, fod y broses o fancio arian yn arfer bod yn "hawdd".

"Ond ers i fanc Barclays gau yn Aberystwyth, y ddau le agosaf i ni fancio yr arian yw Caerfyrddin neu Llandudno," meddai.

"Fel allwch chi ddychmygu mae hynny yn dipyn o siwrne.

"Mae hyn yn broblem ar draws Cymru i bob math o elusennau, gan gynnwys yn sicr Merched y Wawr."

Mae hybiau bancio yn gallu bod yn anodd i'w defnyddio am fod diffyg cysondeb, meddai Emma Aue

Ym Mrynaman, mae Eglwys Sant Catherine yn defnyddio'r Swyddfa Bost i fancio arian.

Does dim banc yn y pentref erbyn hyn ac mae banciau mewn trefi cyfagos yn cau.

Un o'r aelodau yw Emma Aue: "Ma' fe yn anodd, achos ma' lot o'r bobl sy'n helpu yn yr Eglwys yn henach a dy' nhw ddim ishe gneud bancio ar-lein, a ffili teithio.

"'Sdim modd gan lot o bobl i deithio i'r banc, felly mae yn anodd iawn. Hefyd ma' problem gyda'r we lan fan hyn, 'sdim signal 'da pawb."

Wrth drafod y posibilrwydd o ddefnyddio hybiau bancio mae'n dweud bod diffyg cysondeb.

"Yn rhai o'r hybiau ma' nhw ond ar agor am tua awr, unwaith yr w'thnos ac os nad yw y trysorydd yn gallu bod yn yr hwb ar yr amser penodol yna, wel does dim help o gwbl."

Mae'r Parchedig Susan Barnett yn gofalu am bedair eglwys yn Nyffryn Aman

Mae'r Parchedig Susan Barnett yn gofalu am bedair eglwys yn Nyffryn Aman.

Mae'n dweud ei bod hi'n anodd heb y banciau wrth ddelio â phethau fel newid neu agor cyfrif newydd.

"Cofiwch gwirfoddolwyr yw y bobl sy'n helpu fel trysoryddion yn ein heglwysi," meddai. "Mae yn gofyn llawer."

Mae'r corff sy'n cynrychioli'r banciau - UK Finance - yn dweud eu bod nhw'n "gweithio yn agos gyda mudiadau elusennol er mwyn deall y problemau a'r heriau maen nhw'n wynebu".

Ychwanegodd llefarydd fod y gwasanaethau maen nhw'n gynnig i elusennau yn parhau i gael eu hadolygu.