Storm Darragh: 'Digwyddiad difrifol' a miloedd heb drydan

Mae 95,000 o gartrefi a busnesau heb drydan ac mae digwyddiad difrifol wedi ei gyhoeddi mewn sawl sir yng Nghymru yn sgil Storm Darragh.

Mae Heddlu Dyfed-Powys wedi cyhoeddi digwyddiad difrifol ar draws siroedd Caerfyrddin, Ceredigion, Penfro a Phowys.

Mae'r heddlu yn yr ardal yn dal i gael nifer uchel o alwadau am drafferthion ar y ffyrdd wrth i goed syrthio ac amodau gyrru anodd, er bod y rhybudd coch wedi dod i ben.

Yn y gogledd, mae'r heddlu'n dweud eu bod nhw'n "gweithio'n galed i wneud y ffyrdd yn ddiogel" ond bod "maint y dinistr yn golygu ei bod hi'n amhosib codi'r holl goed sydd wedi syrthio cyn iddi nosi".

Ychwanegodd yr Uwcharolygydd, Owain Llewellyn, na fydd modd rhoi arwyddion yn rhybuddio gyrwyr o bob perygl ac y dylai gyrwyr "yrru gyda gofal mawr a pheidio gyrru o gwbl os ydi hynny'n bosib".

Dywedodd hefyd bod rhybuddion llifogydd yn y sir.

Edrychwch yn ôl ar brif ddigwyddiadau'r dydd yma.

Ar un adeg ddydd Sadwrn, roedd dros 100,000 o gartrefi heb drydan.

Erbyn 17:30, roedd dros 64,000 o gartrefi wedi colli pŵer yn y de a'r gorllewin.

Yn y gogledd, dywedodd y cyflenwr, SP Energy, bod dros 30,000 heb drydan yno.

Mae 'na rybudd na fydd modd adfer y trydan mewn rhai ardaloedd tan ddydd Sul.

Mae modd cadw golwg ar y sefyllfa mewn ardaloedd unigol ar wefannau National Grid a SP Energy.

Tonnau uchel ym Mhorthcawl fore Sadwrn

Am 19:00 roedd 28 rhybudd llifogydd mewn grym gan Gyfoeth Naturiol Cymru - y mwyafrif yn y canolbarth a'r gorllewin.

Maen nhw'n cynnwys ardaloedd o amgylch Afon Gwy ger Llanfair-ym-muallt, Afon Teifi yn Llanbedr Pont Steffan ac Afon Wysg yn Aberhonddu.

Mae 'na hefyd 70 rhybudd "i fod yn barod am lifogydd".

Roedd y Swyddfa Dywydd wedi cyhoeddi'r rhybudd mwyaf difrifol ar gyfer gwyntoedd cryfion - rhybudd coch - rhwng 03:00 a 11:00 fore Sadwrn, ar gyfer 13 o siroedd Cymru.

Er bod y rhybudd coch wedi dod i ben, mae rhybuddion oren a melyn am wynt a glaw yn parhau mewn grym.

Mae'r Swyddfa Dywydd bellach yn dweud bod y rhybudd melyn am law wedi cael ei ymestyn tan 21:00 heno ac mae rhybudd melyn am wynt wedi ei ymestyn tan 18:00 ddydd Sul.

Yn wreiddiol roedd y rhybudd melyn i fod yn dod i ben am 06:00 fore Sul, ond mae hynny bellach wedi cael ei ymestyn 12 awr at 18:00.

Mae'n ymddangos bod Afon Gwy wedi gorlifo yn Llanfair-ym-Muallt, gyda cheir dan ddŵr

Mae llifogydd wedi achosi difrod i'r siop ddodrefn yma yn Llanfair-ym-Muallt

Mewn neges ar y cyd â'i dirprwy Huw Irranca-Davies, dywedodd y Prif Weinidog, Eluned Morgan, eu bod "yn meddwl am bobl sydd wedi dioddef difrod i'w heiddo yn y storm".

Gan ddiolch i'r gwasanaethau brys ac ymatebwyr eraill "sydd wedi gweithio drwy'r nos mewn amodau ofnadwy", maen nhw'n rhybuddio y gallai effeithiau'r storm bara am "rai dyddiau eto".

Ychwanegodd y neges: "Mae rhybuddion yn parhau i fod mewn lle, felly parhewch i fod yn wyliadwrus, a gofalwch am eich gilydd."

Yn siarad ar raglen Dros Frecwast BBC Radio Cymru fore Sadwrn, dywedodd Sian Williams o Gyfoeth Naturiol Cymru fod "rhybuddion llifogydd allan ar draws Cymru gyfan".

"'Da ni wedi bod yn monitro lefelau'r afonydd, mae'r afonydd yn codi.

"Dydyn ni ddim yn disgwyl cymaint o law a be' welson ni adeg Storm Bert bythefnos yn ôl, ond mae'r tir yn andros o wlyb ers hynny.

"'Da ni wedi cael glaw rhwng hynny a rŵan, felly ma' bosibilrwydd bydd yr afonydd yn codi i ymateb i'r glaw 'da ni'n gael."

Coeden wedi syrthio yng Nghaerdydd

Mae'r tywydd yn effeithio ar nifer o ffyrdd a theithwyr, wrth i'r M48 dros Bont Hafren a'r A55 dros Bont Britannia gau ddydd Sadwrn.

Cafodd rhannau o'r M4 ei gau mewn sawl man, gan gynnwys yn ardal Llansawel, Pen-y-bont a Chasnewydd.

Cafodd yr A470 ei gau yn Nolgellau, Rhaeadr Gwy a Merthyr Tudful a'r A40 mewn sawl man yn y gorllewin.

Yn Abertawe, mae nifer o goed wedi syrthio yn ystod gwyntoedd cryfion ac mae'r Cyngor Sir yn atgoffa pobl i fod yn "ofalus iawn os oes rhaid gyrru yn ystod y storm".

Wedi i Storm Bert achosi difrod i ardaloedd yn Rhondda Cynon Taf, mae'r cyngor sir yn dweud bod o leiaf 40 o goed wedi syrthio dros nos a ddydd Sadwrn.

Mae cyhoeddi rhybudd coch yn anarferol i'r Swyddfa Dywydd

Cafodd degau o ddigwyddiadau, gwasanaethau a safleoedd eu cau neu eu canslo ar draws Cymru.

Doedd 'na ddim hediadau o faes awyr Caerdydd tan 13:00 ddydd Sadwrn ac mae nifer o wasanaethau trên wedi eu canslo.

Cafodd gwasanaethau Stena Line rhwng Caergybi a Dulyn yn Iwerddon eu canslo, a hefyd rhwng Abergwaun a Rosslare.

Mae holl gemau Undeb Rygbi Cymru a Chymdeithas Bêl-droed Cymru wedi eu gohirio ddydd Sadwrn, gyda'r gêm rhwng Caerdydd a Watford wedi ei chanslo "am resymau diogelwch".

To wedi chwythu oddi ar dŷ yn Rest Bay ger Porthcawl yn Sir Pen-y-bont ar Ogwr

Mae safle Gŵyl y Gaeaf yng nghastell Caerdydd a Neuadd y Ddinas a'r goleuadau ym Mharc Bute wedi cau, yn ogystal â safle Gŵyl y Gaeaf yn Abertawe a Chasnewydd.

Roedd nifer o adeiladau ac atyniadau wedi cau ddydd Sadwrn hefyd, gan gynnwys Llyfrgell Genedlaethol Cymru yn Aberystwyth, yr Ardd Fotaneg Genedlaethol a holl safleoedd Cyfoeth Naturiol Cymru.

'Cymuned wedi eu llorio'

Cafodd to eglwys babyddol Pentre yn Mochdre ym Mhowys ei chwythu i ffwrdd yn llwyr yn y gwyntoedd cryfion.

Dywedodd Jonathan Rees, sydd wedi bod yn cydlynu'r help, bod "y gymuned wedi eu llorio" ac y byddai nifer o bobl sydd yn byw yn yr ardal "wedi ei magu yn yr eglwys".

Difrod i Eglwys babyddol Pentre yn Mochdre ym Mhowys

Mae'n dyfalu y gallai fod yna gorwynt wedi taro'r eglwys gan bod y to ar wasgar ar draws y fynwent.

Roedd wedi ceisio rhoi neges ar y cyfryngau cymdeithasol am help i geisio achub yr organ a'r pulpud ond ei bod yn "rhy beryglus a bod y gwyntoedd yn dal yn gryf iawn".

Dywedodd Marc Morris nad oes gan rai pobl yn yr ardal ddŵr na thrydan yn yr ardal

Mae Marc Morris yn byw yn ardal Llangynnwr yn Sir Gaerfyrddin, lle mae nifer o goed wedi syrthio.

Dywedodd: "Fi'n cadw llygad ar fenyw sy'n 94 sy'n byw ar bwys, a s'dim pwer na dŵr gyda hi, felly fi 'di bod lawr i'r siop i gael torch a cwpwl o bethau iddi achos so ni'n disgwyl cael trydan nôl tan bwti saith o'r gloch heno."

Mae rhan o'r A40 wedi cau wedi i goed ddisgyn ar y ffordd ar gyrion Casblaidd yn Sir Benfro

Nos Wener, cafodd rhybudd ei anfon gan Lywodraeth y Deyrnas Unedig i ffonau symudol yn cyngori pobl "i beidio mentro allan oni bai bod hynny'n hollol angenrheidiol, oherwydd perygl i fywyd".

Mewn cyfweliad â BBC Cymru, dywedodd Prif Weinidog Cymru, Eluned Morgan: "Dwi ddim yn credu y gallen ni fod wedi gwneud mwy i rybuddio pobl."

"Dyma'r tro cyntaf i'r system larwm gael ei ddefnyddio ar raddfa fawr iawn ac felly yn amlwg bydd ganddon ni bethau i'w dysgu o hynny ond dwi'n meddwl o'dd pobl yn ymwybodol bod storm ar y ffordd a'u bod nhw wedi talu sylw i'r rhybuddion hynny."