Reform UK: 'Angen adolygu'r berthynas rhwng BBC Cymru a Phlaid Cymru'

Mae Reform UK wedi galw am adolygiad o berthynas BBC Cymru â Phlaid Cymru.

Mewn cyfweliad gyda Newyddion S4C dywedodd Cai Parry-Jones o blaid Reform UK: "Dan ni'n gwybod bod Rhun ap Iorwerth wedi bod yn chief political correspondent i BBC Wales am bump blwyddyn.

"Mae Aled ap Dafydd - rhywun sydd wedi bod yn uchel iawn yn BBC Cymru a S4C efo Newyddion yn Director of Political Strategy i Plaid Cymru.

"Dwi ddim yn dweud bod hyn yn profi rhagfarn sefydliadol yn y BBC i Plaid Cymru ac yn erbyn pleidiau fel Reform - ond mae'n rhaid i ni gael adolygiad i fewn i hyn."

Yn dilyn ymddiswyddiadau y Cyfarwyddwr Cyffredinol, Tim Davie, a'r Pennaeth Newyddion, Deborah Turness nos Sul fe wnaeth arweinydd plaid Reform UK, Nigel Farage, roi fideo ar y cyfryngau cymdeithasol a oedd, yn ei ôl ef, yn enghraifft o ogwydd honedig y gorfforaeth.

Mae Nigel Farage wedi beirniadu'r BBC a phenodiad cyfarwyddwr BBC Cymru sydd bellach yn gyfarwyddwr dro ar y cenhedloedd, Rhuanedd Richards

Yn y fideo dywedodd Mr Farage bod y ffaith fod Rhuanedd Richards, Cyfarwyddwr Cenhedloedd dros dro y BBC yn arfer bod yn Brif Weithredwr Plaid Cymru ac wedi gweithio i'r llywodraeth yn dystiolaeth, yn ei farn ef, o duedd adain chwith y BBC.

Dywedodd llefarydd ar ran y BBC: "Mae Rhuanedd Richards wedi gweithio i'r BBC ers 2018 ac yn Gyfarwyddwr BBC Cymru ers 2021. Mae hi'n gyfarwyddwr dros dro ar y cenhedloedd ar hyn o bryd.

"Nid yw Rhuanedd wedi celu ei chefndir proffesiynol ac mae hi'n gwbl ymroddedig i gynnal safonau didueddrwydd y BBC."

Doedd Rhuanedd Richards, aelod bwrdd y BBC dros Gymru Michael Plaut na chyfarwyddwr y BBC yng Nghymru, Garmon Rhys, ddim ar gael i siarad am bryderon Reform UK nag am effaith bosib sefyllfa'r bresennol y BBC ar ddarlledu Cymraeg a Chymreig.

Doedd Plaid Cymru ddim am ymateb i sylwadau Reform UK.

Mae angen edrych eto ar lywodraethiant y BBC yn ganolog, medd Karl Davies

Yn ôl Karl Davies, un sydd a phrofiad o weithio mewn rôl flaenllaw yn BBC Cymru ac sydd hefyd yn gyn-Brif Weithredwr Plaid Cymru, mae angen edrych eto ar lywodraethiant y BBC yn ganolog.

"Rhwng 2007 a 2017 roedd gynnon ni Ymddiriedolaeth y BBC oedd yn gweithredu yn gwbl agored a chwbl dryloyw - o'n i'n rhan o'r broses honno," meddai.

"Fe wnaeth y llywodraeth. am ryw reswm, nôl yn 2016 benderfynu wneud i ffwrdd efo hynny a 'dan ni nôl rwan i'r hen drefn lle mae cyfeillion i wleidyddion sy'n cael lle wrth y bwrdd llywodraethol - a nid dyna'r ffordd o redeg gwasanaeth darlledu cyhoeddus."

Doedd y BBC ddim am ymateb i'r sylwadau ac mae cais wedi cael ei wneud i Lywodraeth y DU am sylw.

Yng Nghorwen barn gymysg oedd yna am werth newyddiaduraeth y gorfforaeth a gwerth am arian ffi'r drwydded.

"Dwi'n trysto newyddiaduraeth y BBC ond ddim yn hapus be 'dan ni'n talu," oedd un sylw.

Dywedodd un arall nad oedd hi'n ymddiried yn newyddiaduraeth y BBC ac nad oedd hi am dalu am y drwydded.

Bydd sylwadau felly yn poeni penaethiaid y BBC.

Ymhen dwy flynedd bydd penderfyniad terfynol ar ariannu'r gorfforaeth at y dyfodol.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.