Teyrnged i ddyn fu farw ar yr M4 yn Sir Gâr

Bu farw Stephen Abbott mewn gwrthdrawiad ar yr M4 ddydd Llun diwethaf

Mae teulu wedi rhoi teyrnged i ddyn a fu farw ar yr M4 yn Sir Gâr yr wythnos ddiwethaf.

Bu farw Stephen Abbott, 56, mewn gwrthdrawiad gyda lori oedd ddim yn symud ar y ffordd rhwng Hendy a Phont Abraham ddydd Llun, 18 Mawrth.

Dywedodd ei deulu: "Roedd Steve yn gymeriad anferth a oedd yn adnabyddus yn lleol a thrwy ei waith gyda grŵp Bar 44, am dros 20 mlynedd yn y Bont-faen ac yn ddiweddarach yn Parador, Caerdydd.

"Wedi'i fagu ym Mhorthcawl, bu'n byw yn ardal Pen-y-bont ar Ogwr cyn symud i Sir Gaerfyrddin.

"Bydd ei deulu, ei ffrindiau a'i gydweithwyr yn ei golli'n fawr iawn.

"Mae ei farwolaeth sydyn wedi ein gadael yn dorcalonnus, a gofynnwn i unrhyw un a all helpu’r heddlu gyda’u hymholiadau i wneud hynny.”

Dywedodd teulu Mr Abbott eu bod yn "dorcalonnus" yn dilyn ei farwolaeth sydyn

Dywedodd Heddlu Dyfed-Powys eu bod yn parhau gyda'u hymholiadau i'r gwrthdrawiad, a ddigwyddodd tua 23:20.

Yn ôl y llu, fe wnaeth Mr Abbott adael ei dŷ yng Ngorslas yn ei gar Kia Cee'd llwyd/glas tua 21:45 cyn gwneud ei ffordd ar yr M4 ac yna heibio Hendy, Pontarddulais a Pontlliw.

Trodd Mr Abbott yn ôl wedyn tuag at Bont Abraham i ailymuno â'r M4 cyn iddo daro'r lori.

Mae'r llu yn apelio ar unrhyw un sydd â gwybodaeth am y digwyddiad i gysylltu â nhw.