Bachgen, 13, wedi boddi mewn afon yn ddamweiniol ar ôl mynd yn sownd

Bu farw Kane Edwards wedi iddo fynd yn sownd ger coeden ar wely Afon Tawe

Mae crwner wedi dod i'r casgliad mai damwain oedd marwolaeth bachgen 13 oed a foddodd yn Afon Tawe.

Roedd Kane Edwards yn 13 oed pan aeth i nofio yn yr afon gyda ffrind ym mis Mai 2022.

Clywodd y cwest yn Abertawe fod ei droed wedi mynd yn sownd mewn coeden ar wely'r afon ac fe dreuliodd fwy nag awr o dan y dŵr.

Ni lwyddodd y gwasanaethau brys i'w adfywio.

Ar ddiwedd ail ddiwrnod y cwest daeth y crwner Edward Ramsay i'r casgliad bod marwolaeth Kane yn ddamweiniol.

Dywedodd "ei fod wedi boddi wedi iddo gael ei ddal mewn gweddillion ar wely'r afon a bod y dŵr yn llifo'n gyflym".

'Oedi heb gael effaith'

Ddydd Llun clywodd y cwest yn Abertawe bod Hannah Stanley o dîm galwadau Gwasanaeth Ambiwlans Cymru wedi dweud mewn datganiad nad oedd hi'n hawdd adnabod union leoliad y digwyddiad ac nad oedd y cysylltiad drwy 'what3words' wedi gweithio.

Ond wrth grynhoi dywedodd y crwner, er bod yna "rhywfaint o oedi" cyn i'r gwasanaethau brys gyrraedd, ei fod yn "hollol fodlon" nad oedd hynny wedi cael unrhyw effaith ar achos marwolaeth Kane Edwards.

Ychwanegodd Mr Ramsay: "Yn drasig, mae'n debyg bod Kane wedi boddi ar yr adeg y gwelwyd ef ddiwethaf gan ei ffrind.

"Pan aeth Kane i nofio, nid oedd yn ymwybodol o gwbl o'r peryglon oddi tano."

Dywedodd hefyd ei fod am dderbyn rhagor o wybodaeth gan Wasanaeth Ambiwlans Cymru cyn penderfynu a fyddai'n cyhoeddi adroddiad atal marwolaethau yn y dyfodol ai peidio.

Mae aelodau o deulu Kane wedi galw am osod bwi achub yn y safle lle bu farw.

Clywodd y cwest nad oedd unrhyw ddigwyddiadau wedi bod ar y safle cyn marwolaeth Kane

Ddydd Mawrth dywedodd Rheolwr Diogelwch Dŵr Cyngor Abertawe, Andrew Suter, wrth y cwest nad oedd unrhyw ddigwyddiadau wedi bod ar y safle cyn marwolaeth Kane.

Ers i Kane farw, mae'r ardal wedi cael ei hasesu o ran risg ac mae nifer o arwyddion wedi'u gosod ar hyd y llwybr wrth yr afon, yn rhybuddio am beryglon mynd i mewn i'r dŵr, meddai.

Ychwanegodd fod bwi achub hefyd wedi'i osod ar blatfform pysgota ymhellach i fyny'r afon ac y bydd llwyni draen yn cael eu gosod ger y morgloddiau er mwyn atal mynediad at y pyllau dŵr yno.

Ond pan bwysodd y teulu arno i ailystyried lleoli bwi achub ar y safle, dywedodd Mr Suter y byddai'n asesu'r safle eto.

Ar ddiwedd y cwest dywedodd teulu Kane eu bod yn derbyn bod Kane wedi marw mewn "damwain drasig".

Fe wnaethon nhw hefyd ddiolch i aelodau'r gwasanaethau brys a geisiodd ei helpu.

Dywedon nhw eu "bod wedi cael cysur o'r ffaith bod y gwasanaethau lleol wedi gwneud newidiadau lle bo angen".

Cais i 'ailasesu y risg eto'

Wedi diwedd y cwest dywedodd Gethin Edwards, ewythr Kane: "Mae wedi bod yn gyfnod anodd iawn i'r teulu ac mae wedi bod yn rhai blynyddoedd cyn cyrraedd y pwynt hwn.

"Rydym wedi derbyn adborth gan y gwasanaethau brys a phawb sydd wedi bod yn rhan ohono.

"Cafodd rhai cwestiynau anodd eu gofyn yn y cwest ond ry'n yn cymryd cysur yn y ffaith y bydd camgymeriadau yn cael eu cywiro... ac y bydd newidiadau i hyfforddiant.

"Mae'r cyngor wedi asesu'r ardal ac wedi cyflwyno mesurau ond yr hyn sydd wedi dod i'r amlwg heddiw yw ein bod yn teimlo bod y bwi agosaf yn daith gerdded 20 munud o lle digwyddodd y ddamwain ac roedd yna bump neu chwech o blant yn nofio yn yr union fan nos Lun.

"Rwy'n credu bod y cyngor yn mynd i ailasesu y risg eto a'n cais o roi bwi lle mae angen un."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.