Dau yn pledio'n ddieuog i losgi gyda'r bwriad o beryglu bywyd

Bu'n rhaid i nifer o bobl adael eu cartrefi wedi'r tân yn oriau man 28 Gorffennaf

Mae dau ddyn wedi pledio'n ddieuog i achos o losgi bwriadol gyda'r bwriad o beryglu bywyd yn dilyn tân mewn tŷ yn Rhondda Cynon Taf.

Bu'n rhaid i nifer o bobl adael eu cartrefi wedi'r tân ar Stryd Protheroe, Glynrhedynog yn oriau man 28 Gorffennaf, ond ni chafodd unrhyw un eu hanafu.

Fe wnaeth Lewis Manito, 32 o Weston-super-Mare yn ne orllewin Lloegr, bledio'n ddieuog i losgi bwriadol gyda'r bwriad o beryglu bywyd, llosgi di-hid heb ystyried y perygl i fywyd a gwyrdroi cwrs cyfiawnder drwy gael gwared ar gar.

Plediodd Connor Pitt, 23, ac sydd hefyd yn dod o Weston-super-Mare, yn ddieuog i losgi bwriadol gyda'r bwriad o beryglu bywyd.

Mae dau ddyn arall - Auryn Guster, 19, ac Alfie Wheeler, 18 - eisoes wedi cyfaddef achos o losgi bwriadol gyda'r bwriad o beryglu bywyd mewn cysylltiad â'r digwyddiad.

Mae Mr Wheeler hefyd wedi ei gyhuddo o fod â machete, math o gyllell fawr, yn ei feddiant a bydd y ddau yn cael eu dedfrydu yn ddiweddarach.

Mae pumed diffynnydd, Storm Truman, 19, hefyd wedi ei chyhuddo o losgi bwriadol gyda'r bwriad o beryglu bywyd ac mae disgwyl iddi ymddangos yn Llys y Goron Caerdydd ar 25 Medi.

Mae disgwyl i'r achos yn erbyn Mr Manito a Mr Pitt ddechrau ym mis Ionawr.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.