Cyhuddo pumed person yn dilyn tân difrifol mewn tŷ

Cafodd y gwasanaethau brys eu galw i'r digwyddiad yng Nglynrhedynog am 01:25 fore Llun, 28 Gorffennaf

Mae pumed person wedi cael ei gyhuddo yn dilyn tân difrifol mewn tŷ yn Rhondda Cynon Taf.

Roedd difrod sylweddol i un tŷ wedi'r tân ar Stryd Protheroe, Glynrhedynog fore Llun 28 Gorffennaf.

Fe wnaeth tri dyn 18, 19 a 23 oed a menyw 19 oed - i gyd yn dod o ardal Weston-super-Mare yn ne orllewin Lloegr - ymddangos yn y llys ar 30 Gorffennaf.

Mae Heddlu De Cymru yn dweud fod Lewis Manito, 32 oed, hefyd o ardal Weston-super-Mare, wedi ei gyhuddo ar amheuaeth o losgi bwriadol gyda'r bwriad o beryglu bywyd.

Mae Auryn Gustar, 19, Storm Truman, 19, Connor Pitt, 23, ac Alfie Wheeler, 18, hefyd wedi eu cyhuddo o losgi bwriadol gyda'r bwriad o beryglu bywyd.

Mae Mr Wheeler hefyd wedi'i gyhuddo o fod â chyllell yn ei feddiant mewn man cyhoeddus.

Clywodd Llys Ynadon Merthyr Tudful ddydd Mercher fod y pedwar wedi "teithio gyda'i gilydd i dargedu" eiddo penodol gan gredu nad oedd "dau unigolyn wedi ad-dalu dyled cyffuriau".

Yn ogystal, fe glywodd y llys fod gwerth £650,000 o ddifrod wedi ei achosi a bod yr achos mor ddifrifol bod rhaid cyfeirio'r achos at Lys y Goron.

Nid yw'r un diffynnydd wedi cyflwyno ple, ac fe fydd y pedwar yn cael eu cadw yn y ddalfa tan y gwrandawiad nesaf yn Llys y Goron Merthyr Tudful ar 27 Awst.

Mae Mr Manito hefyd yn parhau yn y ddalfa.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.