Jac Morgan yn dechrau i'r Llewod yn y tîm ganol wythnos

A fydd Jac Morgan yn creu digon o argraff i gael ei gynnwys ar gyfer yr ail gêm brawf?

Mae Jac Morgan wedi'i ddewis yn nhîm y Llewod i wynebu First Nations and Pasifika XV ym Melbourne ddydd Mawrth.

Bydd y Cymro yn gwisgo'r crys rhif 6 am y tro cyntaf ar y daith, gan obeithio gwasgu ei hun i fewn i'r garfan i wynebu Awstralia yn yr ail gêm brawf ddydd Sadwrn.

Er gwaethaf perfformiadau da drwy gydol y daith, ni chafodd Morgan ei ddewis ar gyfer y gêm brawf agoriadol, gyda'r Llewod yn ennill 27-19.

Dyna'r tro cyntaf i Gymro beidio gael ei ddewis ar gyfer gêm gyntaf cyfres y Llewod ers y daith i Dde Affrica yn 1896, yn ôl un ystadegydd rygbi.

Bydd Owen Farrell yn gapten ar y tîm ddydd Mawrth, gyda Josh van der Flier a Henry Pollock yn ymuno gyda Morgan yn y rheng-ôl.

Mae'n annhebygol y bydd nifer o'r 23 - sy'n cynnwys naw Albanwr - yn llwyddo i berswadio Andy Farrell i newid gormod ar ei dîm ar gyfer yr ail gêm brawf.

Tîm y Llewod

Kinghorn, Graham, Osborne, Farrell (capt), Van der Merwe, F Smith, White; Schoeman, George, Bealham, Ryan, Cummings, Morgan, Van der Flier, Pollock

Eilyddion: Ashman, Sutherland, Clarkson, Brown, Earl, Mitchell, M Smith, Ringrose

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.