Cymru yn cyrraedd Euro 2025 ar ôl curo Gweriniaeth Iwerddon

Mae tîm pêl-droed merched Cymru wedi cyrraedd pencampwriaeth fawr am y tro cyntaf yn eu hanes ar ôl curo Gweriniaeth Iwerddon yn Nulyn.

Gyda lle yn Euro 2025 yn y fantol, fe lwyddodd Cymru i ddal eu gafael yn arwrol yn y munudau olaf yn Stadiwm Aviva.

Roedd Hannah Cain a Carrie Jones wedi rhoi Cymru 2-0 ar y blaen, cyn i Iwerddon haneru'r fantais gyda gôl hwyr.

Ond fe orffennodd y gêm yn 2-1 i'r ymwelwyr, gan arwain at orfoledd i dîm Rhian Wilkinson.

Hannah Cain yn dathlu ar ôl sgorio'r gôl agoriadol

Fe gychwynnodd Gweriniaeth Iwerddon ar y droed flaen, yn ennill dwy gic cornel yn y munudau cyntaf.

Ond roedd Cymru'n gyfforddus allan o feddiant, ac roedd hi'n ddechrau digon tawel i'r gôl-geidwad Olivia Clarke.

Roedd y Gwyddelod yn mynnu ei gwneud hi'n gêm gorfforol, ond roedd Cymru'n ymdopi'n dda.

Daeth seibiant byr wrth i ergyd gyntaf Cymru o'r gêm ddod gan Jess Fishlock, ar ôl iddynt fanteisio ar bas wael yng nghanol y cae.

Fe ddilynodd un o gyfleoedd gorau'r Gwyddelod o'r hanner, wrth i Denise O'Sullivan daro'r postyn gydag ergyd o bellter.

Roedd y Gwyddelod yn mynnu i'w gwneud hi'n gêm gorfforol, ac roedd Cymru'n ymdopi'n dda

Gyda'r Gwyddelod yn rheoli'r meddiant, roedd y pwysau ar Gymru'n parhau ac fe wnaeth Clarke arbediad acrobatig o ergyd gan Julie Russell yn y cwrt cosbi i gadw'r sgôr yn gyfartal.

Ond o fewn ychydig o funudau, roedd Gweriniaeth Iwerddon ar y droed ôl eu hunain am gyfnod, gyda chic rydd gan Lily Woodham yn arwain at ddwy gic cornel ac ergyd o fewn y cwrt cosbi.

Roedd Katie McCabe yn ffodus i osgoi ail gerdyn melyn tuag at ddiwedd yr hanner ar ôl iddi ddod yn agos iawn i gicio Rachel Rowe.

Fe wnaeth y pwysau gynyddu ar dîm Rhian Wilkinson a oedd mewn gwirionedd yn hapus i glywed y chwiban am hanner amser.

Carrie Jones yn dathlu ar ôl sgorio ail gôl Cymru

Fe enillodd Cymru gic rydd ar ddechrau'r ail hanner yn dilyn trosedd ar Fishlock.

Aeth y bêl allan am gic i'r golwr i ddechrau ond - i syndod y Gwyddelod - awgrymodd y dyfarnwr teledu y dylai cic o'r smotyn gael ei ddyfarnu.

Ac o fewn ychydig o eiliadau, roedd Cymru wedi dechrau'r ail hanner yn y ffordd gorau posib gyda Hannah Cain yn ei gwneud hi'n 1-0.

Daeth Cain yn agos i'w gwneud hi'n 2-0, ond roedd ei rhediad yn fymryn rhy hwyr i gyrraedd croesiad isel Rowe.

Nid oedd yn rhaid aros yn hir am gyfle arall, ond fe saethodd Angharad James yn syth at gôl-geidwad y Gwyddelod, Courtney Brosnan, ar ôl rhediad campus o'u hanner eu hunain.

Gyda hanner awr i fynd, daeth Ffion Morgan a Carrie Jones ymlaen am Cain a Fishlock, a adawodd y cae oherwydd anaf.

Gydag un o'i chyffyrddiadau cyntaf o'r gêm, fe wnaeth Jones ei gwneud hi'n 2-0 i Gymru ar ôl pas wych gan Woodham i'w rhoi'n glir am gôl.

Cymru'n dathlu cyrraedd Euro 2025 ar ôl curo Gweriniaeth Iwerddon

Ar ôl delio â sawl cic gornel gan y Gwyddelod, fe ddaeth gôl gyntaf Gweriniaeth Iwerddon o'r gêm gan Anna Patten o groesiad Katie McCabe.

Roedd Cymru dan gryn bwysau am y munudau olaf, wrth i'r Gwyddelod chwilio am ail gôl.

Ond fe wnaeth Cymru amddiffyn yn wych, a dangos cryn dipyn o gymeriad i gadw'r sgôr yn 2-1 ac i sicrhau eu lle yn y Swistir ar gyfer Euro 2025.