Cymeriad Lily Beau yn 'chwa o awyr iach' yng Nghwmderi

Fel gwyliwr selog o Pobol y Cwm, mae Lily Beau wedi gwireddu breuddwyd drwy ymuno gyda chast Cwmderi.

Mae'r actores ifanc o Gaerdydd newydd gychwyn saethu ei golygfeydd cyntaf ac yn ymwybodol iawn o'r lle arbennig sy' gan yr opera sebon yng nghalonnau'r gynulleidfa yng Nghymru.

Meddai: "Dwi mor ecsited. Mae'n fraint i fod yn ran o rhywbeth sy' mor bwysig yn diwydiant teledu Cymru ac i ddod mewn fel cymeriad newydd. Mae bod yn yr un stafell a'r cast yn fraint.

"Dwi wedi gweld lot o ffrindiau yn ymuno â'r cast yn y gorffennol ac wedi neud job mor anhygoel ac wrth gwrs mae'n nghariad i (Dyfan Rees, sy'n chwarae rhan Iolo) wedi bod yn y rhaglen am 16 mlynedd so dwi'n hen gyfarwydd â'r rhaglen. Mae ymuno yn wych."

Mae manylion ei chymeriad yn gyfrinach ar hyn o bryd ond mae Lily'n cydnabod: "Mae'n gymeriad llawn bywyd ac yn chwa o awyr iach yn y pentre' ac yn gwylltio ambell i un."

Ac mae Lily'n ymwybodol o ba mor angerddol yw gwylwyr Pobol y Cwm: "Dwi mor gyffrous ond hollol terrified ar yr un pryd. Dwi'n poeni am y swydd mewn ffordd dda a dwi'n gweld y ffordd mae'r ffans yn ymateb.

"Mae'r ffans wir yn 'nabod y cymeriadau – maen nhw'n angerddol iawn ac maen nhw'n ffyddlon iawn i'r cymeriadau. Dwi jest yn gobeithio allai gynnig rhyw fath o adloniant.

"Sym rhaid i bawb garu'r cymeriad ond os maen nhw'n teimlo rhywbeth, da neu drwg..."

Croeso

Mae Lily wedi cael croeso cynnes ar y set, meddai: "Mae rhai o'r cast dwi wedi dod i 'nabod a dod yn ffrindiau drwy Dyfan fy mhartner a dwi wedi gweithio gyda Bethan Ellis Owen o'r blaen a dwi'n ffan ohoni – mae mor dalentog. Pan dwi'n tyfu fyny hi yw pwy dwi moyn bod.

"Dwi'n edrych mlaen at chwarae gyda'r cast mwy a dod i adnabod pawb yn well. Dim ond glimpse dwi wedi cael hyd yn hyn ond mae'n adeg cyffrous."

Ysbrydoliaeth

Cychwynnodd Lily ei gyrfa fel cerddor yn hytrach nag actores ac mae'n dweud fod dysgu ei chrefft wrth actio'n hynod o werthfawr iddi: "Mae 'na actorion ar Pobol y Cwm, yn enwedig y menywod fel Nia Caron...mae'r cyfle i allu bod yn yr un ystafell, i wylio nhw a gweld sut maen nhw'n gweithio, i ddysgu a gweld sut maen nhw'n paratoi at bopeth.

"Fel actores weddol newydd dwi methu cymryd hynny yn ganiataol.

"Mae Cymru wedi bod mor garedig yn gadael i fi ddysgu ar y job."

Nid oedd Lily wedi astudio Drama fel TGAU yn Ysgol Plasmawr, Caerdydd ond mae'n ddiolchgar iawn am help ei hathro drama yn yr ysgol, sef Mr Lewis.

Meddai: "Mae wir wedi hybu hyder fi i fod yn ran o'r diwydiant."

Ers cychwyn fel actores, mae'n teimlo'n ffodus i gael rhannau mewn ffilmiau fel Y Sŵn a rhaglenni deledu fel Bariau ar S4C, lle mae wedi cael cyfleoedd i ddysgu a gwylio actorion eraill.

Ac nawr mae'n cael cyfle i gydweithio gyda'i phartner, fel mae'n sôn: "Mae Dyf 'di bod mor gefnogol o fi'n ymuno â'r rhaglen.

"Mae'r cast mor fawr dydyn ni ddim yn gweld ein gilydd gymaint. Gobeithio fydd mwy o olygfeydd gyda'n gilydd dros amser.

"Mae'r cwm yn fach ac mae pobl yn dod i adnabod ei gilydd so dwi'n gobeithio geith y cymeriadau gyfle i chwarae o gwmpas bach."

Lily yn perfformio

Cerddoriaeth

Yn ogystal ag actio mae Lily yn recordio sengl newydd, Fix your expectations.

Meddai: "Byddai byth yn stopio neud cerddoriaeth – unrhyw gyfle sy' gyda fi i fynd i'r stiwdio neu ysgrifennu gyda rhywun byddai'n cymryd y cyfle."

Gyda gigiau yn dod i fyny dros yr haf, mae Lily yng nghanol ysgrifennu cerddoriaeth newydd, meddai: "Mae cael cyfle i eistedd wrth y piano a chwarae o gwmpas, mae'n gyfnod rili lyfli. Mwy o gerddoriaeth, mwy o gigs, dwi'n trio gwthio fe.

"Mae'r gân newydd am drio gweithio pethau allan tra o'n i'n gweithio yn Llundain ac yn colli gartref – ac yn teimlo bod fi methu byw lan at beth mae pobl ishe i fi fod so dwi'n mynd i fod yn fi fy hun."

Symudodd Lily i fyw yn Llundain i weithio i label gerddoriaeth Sony yn 16 oed gyda chefnogaeth ei rhieni. Bu'n byw yno ar ei phen ei hun i gychwyn ac arhosodd yno nes ei bod yn 21 oed.

Meddai: "Oedd e'n anhygoel ond yn galed.

"Mae bod yng Nghymru yn well (i fi) na Llundain, yn enwedig yn ddiweddar pan mae Cymru wedi agor drysau lan i fi chwarae ac i siarad am fod yn Gymraes ddu.

"Mae hwnna i gyd mor bwysig i fi a'r ffaith fod yr iaith yn cael ei glymu mewn i hwnna yn rial hyfryd. Dwi'n rial falch o fod yn Gymraes."