Gwerthu het enwog y digrifwr Tommy Cooper am £7,000

Het enwog Tommy Cooper yn gwerthu am fwy na dwywaith yr amcanbris

Mae het a oedd yn eiddo i'r digrifwr Tommy Cooper, yn wreiddiol o Gaerffili, wedi ei gwerthu am £7,000 mewn ocsiwn – mwy na dwywaith yr amcanbris.

Roedd yr het, yr un olaf o bosib i'r digrifwr ei defnyddio, yn un o wyth eitem a oedd ar werth mewn gwesty yn Sir Bedford ddydd Sadwrn.

Ymhlith yr eitemau eraill yn yr ocsiwn roedd llythyr gan ei ferch Vicki a nifer o'r byrddau hud a ddefnyddiai.

Dywedodd y gwerthwr Clive Greeenaway - sy'n dynwared Tommy Cooper - iddo gael yr het gan wraig y digrifwr Gwen a fu farw yn 2002.

Yn ôl Amanda Butler, o gwmni Hansons Auctioneers, "yr het oedd uchafbwynt yr ocsiwn".

Amcangyfrifwyd y byddai'r het - eicon ym mherfformiadau Cooper - yn cael ei gwerthu am rhwng £2,000 a £3,000.

Dywedodd Ms Butler y byddai Mr Greenaway yn defnyddio elw'r gwerthiant i ariannu gofalwyr mewn hosbis plant i gynnal sesiynau ioga chwerthin.

Bu farw Tommy Cooper yn 63 oed yn 1984 wedi iddo gael trawiad tra'n perfformio ar lwyfan yn y West End yn Llundain.