Teyrngedau i deulu fu farw yn y gwrthdrawiad awyren yn India

Roedd Akeel Nanabawa a Hannaa Vorajee, ar daith i India gyda'u merch Sara

Mae teulu dyn a gafodd ei fagu yn ne Cymru wedi rhoi teyrnged iddo ef, ei wraig, a'u merch ar ôl i'r tri farw yn y gwrthdrawiad awyren yn India ddydd Iau.

Dywedon nhw eu bod wedi "torri eu calonnau" gan ddisgrifio'u hanwyliaid fel pobl "caredig a pharchus iawn".

Roedd Akeel Nanabawa, Hannaa Vorajee a Sara Nanabawa, a oedd yn bedair oed, yn dychwelyd o daith i India pan darodd eu hawyren i mewn i ardal breswyl.

Mewn datganiad, dywedodd y teulu: "Mae newyddion am y digwyddiad trasig hwn wedi torri ein calonnau, ac rydym yn dal i ddod i delerau gyda beth sydd wedi digwydd."

Roedd 242 o bobl ar yr awyren pan ddaeth i lawr funudau ar ôl gadael maes awyr Ahmedabad am faes awyr Gatwick yn Llundain.

Dydyn ni dal ddim yn gwybod beth achosodd y gwrthdrawiad

Fe darodd yr awyren ardal breswyl, gan ladd 241 o deithwyr a chriw.

Goroesodd un teithiwr, Vishwashkumar Ramesh, dinesydd Prydeinig, y digwyddiad a chafodd driniaeth yn yr ysbyty am anafiadau.

Dywedodd perthynas Hannaa, Hussain Vorajee, o Gaerloyw, wrth y BBC: "Rydym yn drist iawn, roedden nhw'n eneidiau hyfryd rydym nawr wedi'u colli.

"Mae'r gymuned mewn sioc, nid yn unig yng Nghaerloyw ond ledled y wlad.

"Mae teulu ifanc iawn wedi cael ei gymryd oddi wrthym, mae hyn yn rhywbeth nad ydym erioed wedi'i weld, rhywbeth sydd wedi effeithio ar gymaint o deuluoedd.

"Ni fyddwn yn dymuno'r drychineb hon i unrhyw un."

Fe ddisgrifiodd Ruman Hussain (ar y dde) ei ffrind Akeel (yn y canol) fel "dyn hyfryd"

'Bob amser yn gwenu'

Mae dyn o Gasnewydd wedi disgrifio tyfu i fyny gydag Akeel Nanabawa, gan ddweud ei fod "fel brawd" iddo.

Dywedodd Ruman Hussain: "Rydw i wedi'i adnabod drwy gydol fy mywyd.

"Roedden ni gyd arfer gwylio pêl-droed, chwarae criced a chael bwyd gyda'n gilydd.

"Roedd gymaint yn ei hoffi, roedd e'n gwybod pawb yn y gymuned."

Dywedodd Ruman, sy'n gweithio ym maes arlwyo yng Nghasnewydd, iddo glywed am y drasiedi gyntaf ar grŵp WhatsApp pêl-droed lleol.

Ebsoniodd fod brawd Akeel, Hamzah, wedi cadarnhau'r newyddion ofnadwy dros y ffôn yn ddiweddarach.

"Mae'n anodd iawn," meddai Mr Hussain. "Roedd e bob amser yn gwenu. Maen nhw'n dweud mai'r gorau sy'n mynd gyntaf."

Mae tîm o ymchwilwyr o'r Air Accidents Investigation Branch (AAIB) y DU bellach wedi cyrraedd India.

Yn unol â phrotocolau rhyngwladol, dim ond awdurdodau India sy'n gyfrifol am ryddhau gwybodaeth am yr ymchwiliad.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.