Canghellor wedi gwneud 'beth ofynnodd Llywodraeth Cymru amdano'

Roedd Rachel Reeves yn gwadu bod Cymru ar ei cholled wrth ymweld â Ffynnon Taf ddydd Gwener

Mae'r Canghellor Rachel Reeves wedi amddiffyn cynlluniau gwariant Llywodraeth y DU ar gyfer Cymru gan ddweud wrth y BBC ei bod wedi cyflawni'r hyn y gofynnodd Llywodraeth Cymru amdano.

Dywedodd bod y cynllun i wario £445m ar reilffyrdd Cymru dros ddegawd yn "becyn sylweddol", ac amddiffynnodd y £118m a glustnodwyd ar gyfer tomenni glo - sy'n llai na'r £600m a amcangyfrifwyd y gallai fod ei angen.

Dywedodd y Ceidwadwyr Cymreig bod yr adolygiad gwariant yn "gywilyddus" gyda Phlaid Cymru'n dweud bod "Llafur yn bradychu Cymru eto".

Yn ôl un ffynhonnell yn Llywodraeth Cymru mae'r cyfnod buddsoddi o 10 mlynedd yn "wych" gan na fyddai'n bosibl adeiladu'r gorsafoedd fel arall.

Mae gwariant ar y rheilffyrdd wedi bod yn bwnc llosg o fewn gwleidyddiaeth Cymru

Fe wnaeth Rachel Reeves ymweld â depo Trafnidiaeth Cymru yn Ffynnon Taf ddydd Gwener.

Roedd yn gwadu bod yr adolygiad gwariant wedi gadael Cymru ar ei cholled gan ddweud fod Cymru'n cael y swm uchaf erioed o arian.

Mae'r Trysorlys yn darparu £300m ar gyfer pum gorsaf newydd o amgylch Caerdydd a Chasnewydd rhwng 2026 a 2030.

Bydd hefyd yn ariannu gwelliannau gan gynnwys mesurau i wella capasiti yng ngogledd Cymru.

Mae £48m arall yn mynd ar Fetro De Cymru, tra bod £90m yn cael ei ddyrannu dros 10 mlynedd i weithio ar gynlluniau yn y dyfodol.

'Y ddwy lywodraeth yn cydweithio'

Dywedodd Ms Reeves: "Mae'r buddsoddiad hwn yn darparu'r pum gorsaf drenau o Adolygiad Burns yn ne Cymru, gwelliannau i rwydwaith craidd y cymoedd yn ogystal â gwelliannau i groesfannau rheilffordd yng ngogledd Cymru er mwyn cysylltu pobl â'r swyddi sydd ar gael.

"Mae hwn yn fuddsoddiad sylweddol y gofynnodd Llywodraeth Cymru amdano."

Ychwanegodd bod "llywodraeth Lafur yn San Steffan yn gweithio gyda'r llywodraeth Lafur yma yng Nghymru i gyflawni ar gyfer pobl yng Nghymru".

"Ar yr un pryd mae'r setliad datganoli mwyaf erioed i Lywodraeth Cymru ac ar ben hynny hefyd y £118m ar gyfer tomenni glo i gadw pobl yn ddiogel yng Nghymru."

Pan ddywedwyd wrthi ei fod ymhell o dan y £600m a amcangyfrifwyd yn flaenorol y byddai ei angen ar gyfer tomenni glo dywedodd: "Na, y £118m yw'r hyn y gofynnodd Llywodraeth Cymru amdano, ac rydym wedi cyflawni hynny'n llawn."

Gofynnwyd iddi hefyd a oedd Cymru ar ei cholled yn sgil y toriad o 0.9% i wariant cyfalaf Llywodraeth Cymru, dywedodd: "Na, rydym yn buddsoddi yn y seilwaith trafnidiaeth, yn y tomenni glo ac yn cynnig y setliad datganoli mwyaf erioed."

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.