Cymru yn colli o 2-4 yn erbyn Gwlad Belg

Colli fu hanes Cymru o 2-4 yn erbyn Gwlad Belg yn Stadiwm Dinas Caerdydd nos Lun.

Mae'r golled yn golygu bod Cymru yn y trydydd safle yng Ngrŵp J gyda dwy gêm yn weddill.

Fe fydd Cymru'n gorffen eu hymgyrch ym mis Tachwedd gyda thaith i Liechtenstein cyn gêm gartref yn erbyn Gogledd Macedonia.

Rhoddodd Joe Rodon y dechrau perffaith i Gymru ar ôl i'r tîm cartref fygwth gôl Gwlad Belg sawl tro yn y munudau agoriadol.

Roedd yr amddiffynnwr yn rhydd yng nghwrt yr ymwelwyr i benio i'r rhwyd o gic gornel Sorba Thomas wedi saith munud.

Ond fe wnaeth Gwlad Belg daro'n ôl bron yn syth drwy gic o'r smotyn dadleuol Kevin De Bryune.

Roedd y dyfarnwr fideo wedi ymyrryd ar ôl i'r bêl daro llaw Ethan Ampadu yn y cwrt, ac bod ei fraich wrth ei ochr, a'r bêl wedi ei tharo yn agos iddo, fe gytunodd y dyfarnwr ar y cae ei bod yn drosedd gan y Cymro.

Roedd y gêm wedi ei throi ar ei phen yn fuan wedyn wrth i Jeremy Doku ddyfalbarhau i lawr asgell chwith Cymru.

Tynnodd y bêl yn ôl yn berffaith i Thomas Meunier oedd wedi amseru ei rediad yn berffaith i'r cwrt, a tharo chwip o ergyd heibio Karl Darlow yn y gôl i Gymru.

Fe allai Gwlad Belg fod wedi manteisio ymhellach hefyd, wrth i Arthur Theate wastraffu cyfle da yn y cwrt cyn i Rodon lwyddo i atal ergyd Leandro Trossard gydag amddiffyn gwych cyn yr egwyl.

Roedd Doku'n parhau'n fygythiad i lawr yr asgell, gan greu cyfle da i De Bryune, ond tarodd yntau ei ergyd ymhell dros y trawst.

Yr ymwelwyr, felly oedd ar y brig ar yr hanner o 2 i 1.

Ond a oedd 'na lygoden o obaith i Gymru yn yr ail hanner?

Gwelwyd doniau Doku eto ar ddechrau'r ail hanner ac yntau'n bygwth amddiffyn Cymru o'r asgell dde.

Gyda'r dorf yn dechrau codi'i llais, gwelwyd ychydig mwy o dempo yn chwarae'r tîm cartref, yn enwedig i lawr yr asgell chwith lle roedd Thomas yn edrych yn fygythiol a'r bêl wrth ei droed.

Gydag ugain munud o'r gêm yn weddill, daeth siom i Gymru wrth i Ben Davies - a oedd yn ennill ei ganfed cap dros ei wlad heno - orfod adael y cae yn sgil anaf.

Bedair munud yn ddiweddarach, ildiodd Cymru ail gic o'r smotyn wedi i Jordan James lawio'r bêl yn y cwrt cosb.

Fe gafodd y timau gwmni llygoden fawr ar y cae yn ystod yr ail hanner hefyd - a rwystrodd y chwarae am rai munudau.

Sgoriodd Kevin De Bruyne ei ail gôl o'r gêm gan wneud y sgôr yn 1-3 â chwarter awr o'r gêm yn weddill.

Roedd y dorf o dros 32,000 yn Stadiwm Dinas Caerdydd yn parhau i annog Cymru i ymosod a chau'r bwlch, a chafwyd llygedyn o obaith pan rwydodd Broadhead â munud i fynd.

Er hynny, Gwlad Belg gafodd y gair olaf wrth i Trossard sgorio gan wneud y sgôr terfynol yn 2-4.

Yn dilyn y canlyniad hwn, mae Cymru'n drydydd yn y grŵp â dwy gêm yn weddill.

Dilynwch Cymru Fyw ar Facebook, X, Instagram neu TikTok.

Anfonwch unrhyw syniadau am straeon i [e-mail] neu cysylltwch drwy WhatsApp ar 07709850033.

Lawrlwythwch yr ap am y diweddaraf o Gymru ar eich dyfais symudol.