Cau ysgol uwchradd yng Ngwynedd ar ôl canfod llygod mawr

Mae llygod mawr wedi'u darganfod ym mhrif adeilad Ysgol Tryfan, Bangor

Bydd Ysgol Tryfan ym Mangor ar gau ddydd Iau ar ôl i lygod mawr gael eu darganfod ym mhrif adeilad y safle.

Mewn e-bost at rieni, dywedodd yr ysgol eu bod wedi gwneud y penderfyniad yn dilyn trafodaethau gyda swyddogion o Adran Amgylchedd Cyngor Gwynedd.

Bydd yr ysgol ar gau i ddisgyblion ddydd Gwener hefyd ar gyfer hyfforddiant staff cyn gwyliau hanner tymor.

Dywedodd yr ysgol: "Credwn ei bod yn briodol i ni gau ddiwrnod ynghynt er mwyn delio’n llawn gyda’r broblem ar unwaith, fel y gallwn ailagor yn dilyn gwyliau’r hanner tymor, ddydd Llun, 4 Tachwedd."