Casnewydd yn penodi David Hughes yn rheolwr newydd

Fel chwaraewr, fe dreuliodd David Hughes gyfnodau gydag Aston Villa, Amwythig a Chaerdydd

Mae Clwb Pêl-droed Casnewydd wedi penodi David Hughes yn rheolwr newydd.

Mae'r Cymro 47 oed wedi arwyddo cytundeb dwy flynedd gyda'r Alltudion, ar ôl gadael ei rôl fel hyfforddwr ac is-reolwr tîm dan-21 Manchester United.

Fe fydd Hughes yn olynu Nelson Jardim fel rheolwr wedi iddo adael y clwb ym mis Ebrill ar ôl llai na thymor wrth y llyw.

Dywedodd Hughes nad yw "gadael clwb arbennig fel Manchester United fyth yn hawdd" ond ei fod yn "edrych ymlaen at y bennod nesaf".

Cyn ymuno a Manchester United ym mis Awst 2022, roedd Hughes wedi treulio cyfnodau yn hyfforddi timau ieuenctid Caerdydd a Southampton.