Y grŵp 'Dros Dro' yn ennill Cân i Gymru 2025

Mae Dros Dro yn derbyn tlws Cân i Gymru a gwobr ariannol o £5,000
- Cyhoeddwyd
Y grŵp Dros Dro sydd wedi ennill cystadleuaeth Cân i Gymru 2025 gyda'r gân Troseddwr Yr Awr.
Marc Skone oedd yn ail gyda'r gân Diwedd Y Byd, tra mai Meilyr Wyn oedd yn drydydd gyda Lluniau Ar Fy Stryd.
Mae Dros Dro yn derbyn tlws Cân i Gymru a gwobr ariannol o £5,000, tra bo'r ail safle yn derbyn £3,000 a'r trydydd safle yn cael £2,000.
Cafodd y gystadleuaeth ei darlledu yn fyw o Dragons Studios, Pen-y-bont ar Ogwr, gyda Trystan Ellis-Morris ac Elin Fflur yn cyflwyno ar S4C.
Roedd proses bleidleisio newydd ar gyfer y gystadleuaeth eleni, yn dilyn trafferthion y llynedd.

Cafodd y gân Nwy yn y Nen ei chanu ar y noson hefyd - gan Catty, un o'r beirniaid. Cân wnaeth yn wreiddiol ennill Cân i Gymru yn 1971, gydag Eleri Llwyd yn canu.
Un o gewri'r byd cerddoriaeth yng Nghymru, y diweddar Dewi Pws, wnaeth gyfansoddi Nwy yn y Nen.
Y rheithgor wnaeth ddewis yr wyth olaf oedd Osian Huw Williams, Peredur ap Gwynedd, Caryl Parry Jones, Sage Todz a Catty.
'S'dim geirie 'da fi'
Band o Sir Gâr ydy Dros Dro, y band buddugol - ac maent yn gyn-ddisgyblion Ysgol Maes y Gwendraeth ac Ysgol Bro Myrddin.
Wrth dderbyn y wobr, dywedodd un o aelodau'r band ei bod methu coelio'r peth:
"Fi ffili - s'dim geirie 'da fi. Oeddwn i genuinely ddim yn disgwl e o gwbl, just diolch i pawb sydd wedi pleidleisio."
'S'dim rili geirie 'da ni i ddisgrifio'r peth'
Iestyn Jones o'r band Dros Dro yn trafod y profiad o ennill Cân i Gymru
Wrth siarad ar Dros Frecwast fore Sadwrn, dywedodd Iestyn, aelod o'r band ei fod wrth ei fodd fod y band wedi dod i'r brig.
"S'dim rili geirie 'da ni i ddisgrifio'r peth," meddai.
Dywedodd i'r band gael ei sefydlu nôl ym mis Mehefin 2022 yn dilyn cynllun gan Fenter Gorllewin Sir Gar i drefnu mwy o gigs.
"'Naethon ni un gig fel rhywbeth dros dro a 'naethon ni joio cymaint".
"Fel band sy'n gigio yn rheolaidd oedd y stiwdio ddim yn gymaint o sioc, oedd chware o flaen pobl ddim yn neud ni mor nerfus â na, ond gwybod fod popeth yn fyw ar S4C a gwybod fod miloedd o bobl yn gwylio adref bach yn nerve wracking".

Marc Skone oedd yn ail gyda'r gân Diwedd Y Byd
Yr wyth cân a gyrhaeddodd y rhestr fer oedd:
Troseddwr yr Awr - Cyfansoddi a pherfformio: Dros Dro
Am byth - Cyfansoddi: Geth Vaughan. Perfformio: Lewys Meredydd
Torra Dy Gwys - Cyfansoddi: Elfed Morgan Morris, Carys Owen, Emlyn Gomer Roberts. Perfformio: Catrin Angharad Jones
Gwydr Hanner Llawn - Cyfansoddi a pherfformio: Garry Owen Hughes
Mae'r Amser Wedi Dod - Cyfansoddi a pherfformio: Heledd a Mared Griffiths
Lluniau Ar Fy Stryd - Cyfansoddi: Meilyr Wyn. Perfformio: Gwen Edwards
Hapus - Cyfansoddi a pherfformio: Geth Vaughan
Diwedd y Byd - Cyfansoddi a pherfformio: Marc Skone
Pynciau cysylltiedig
Straeon perthnasol
- Cyhoeddwyd17 Chwefror
- Cyhoeddwyd26 Chwefror
- Cyhoeddwyd28 Chwefror